U.d. e kryesueses e Grupit Parlamentar të LVV-së, Mimoza Kusari-Lila, ka thënë se kjo parti e ka marrë konfirmimin nga 80 deputetë se do të marrin pjesë në procesin e votimit të Vjosa Osmanit presidente, raporton Zeri.info.

“Kemi konfirmimin që janë 80 deputetë që vullnetshëm do të marrin pjesë në votimin e presidentit. Përderisa ne nuk mund të dijmë saktë se çfarë do të ndodhë brenda orëve në vijim dhe a do të jenë të njëjtit që do të qëndrojnë prapa konfirmimit të tyre”, ka thënë ajo.

Në një konferencë për media, Kusari-Lila tha se në seancën, e cila do të mbahet në orën 15:00, do të kërkojnë që të kryhet në procedurë të përshpejtuar dhe të kalojë në dy lexime, në mënyrë që të kryhet brenda ditës së sotme, raporton Zeri.info.

Kusari-Lila tha se pastaj varësisht nga afati kohor do të procedohet edhe me seancën e jashtëzakonshme për zgjedhjen e presidentit.

“Kemi vënë kërkesën që seancën e parë të jashtëzakonshme e kemi sot me temën me pikën e vetme të rendit të ditës, amendamentin për ndryshimin e Ligjit për Zgjedhje, proces ky që do të kërkojmë të shkojë në procedurë të përshpejtuar, në dy lexime që do të ndodhin brenda ditës së sotme dhe pastaj varësisht nga afatet kohore do të procedojmë edhe me seancën e jashtëzakonshme për zgjedhjen e presidentit të Republikës së Kosovës…Me vullnetin e deputetëve ne do të caktojmë edhe seancën tjetër të radhës për votimin e presidentit”, tha ajo.

Kusari-Lila po ashtu tha se në rastin më të keq të shkuarjes në zgjedhje, nuk është një vullnet i LVV-së, por që është e pashmangshme.

“Kemi nevojë për një proces zgjedhor në të cilin vullneti qytetar i Republikës së Kosovës nuk do të mohohet, pa marrë parasysh ku jetojnë ata. Dhe në rastin më të keq të zgjedhjes se presidentit, është e pashmangshme dhe nuk do të jetë vullnet yni, por është e pashmangshme shkuarja në zgjedhje nacionale. Kjo është arsyeja që si Grup Parlamentar e kemi ndjerë përgjegjësinë që sado pak në këtë periudhë kohore të mund të përmirësojmë, i cili ka pasur disa mangësi, duke përshirë këtu edhe votat nga mërgata”, tha ajo.

Ndërsa, Kryesia e Kuvendit do të mblidhet sot në orën 15:00, ku do të diskutohet projektligji për ndryshimin dhe plotësimin e Ligjit për Zgjedhjet e Përgjithshme në Kosovë. /Zëri