Kryeministri i Kosovës, Albin Kurti, ka dhënë një prononcim para gazetarëve, ku ka folur rreth takimit të mbrëmshëm me të dërguarin e BE-së për dialogun Kosovë-Serbi, Miroslav Lajçak.

Sipas Kurtit, ndërmjetësuesit ndërkombëtarë vijnë me kërkesa të Serbisë e të cilat sipas tij, janë irracionale.

“Procesi negociator do të duhej të na shpie përpara, unë e respektoj konfidencialitetin e bisedimeve, por po e ritheksoj që asnjë nga 33 marrëveshjet nuk mund të ketë prioritet hierarkik dhe nenet në propozimin e Bashkimit Evropian kanë numra përpara që do të thotë se kanë renditje … 33 marrëveshjet e Brukselit janë të vendosura në një rrafsh horizontal, ndërkaq në anën tjetër këto 10 nene nuk tolerojnë që një nen atje nga fundi të sillet i pari si parakusht”.

Kurti edhe një herë e ka theksuar se Asociacioni i komunave me shumicë serbe i cili po kërkohet nga faktori ndërkombëtar, nuk e ka kaluar testin e Gjykatës Kushtetuese.

“Ka insistim nga faktori ndërkombëtar që Asociacioni i komunave më shumicë serbe, ashtu siç është nënshkruar me datën 19 prill 2019 e më pastaj edhe i elaboruar në shtatë kapituj me nënshkrimin e 25 gushtit të vitit 2015 të theksohet më shumë, por ajo marrëveshje është tashmë e theksuar sepse është e vetmja marrëveshje që nga 33 marrëveshjet e Brukselit që nuk e ka kaluar testin e Gjykatës Kushtetuese. Pra në një mënyrë ajo është marrëveshje e theksuar, është e theksuar në kuptimin juridik e kushtetues për shkak se nuk e ka kaluar testin e Gjykatës Kushtetuese”.

Tutje, ai shton se marrëveshja duhet ta ketë njohjen reciproke në qendër sepse vetëm asisoj bëhet normalizimin i plotë i raporteve ndërmjet Kosovës dhe Serbisë.

“Diplomacia fluturuese iu është bashkangjitur edhe takimeve të nivelit të lartë për propozimin e Bashkimit Evropian, të mbështetur nga Gjermania, Franca dhe Shtetet e Bashkuara të Amerikës. Ky propozim i ka pesë fjali në preambulë dhe 10 nene gjithsej. Kur e patëm marrë ne atë më datën 9 shtator, patëm thënë që është bazë e mirë për diskutimet e mëtutjeshme, është një kornizë e platformë dhe e cila na mundëson që të ecim përpara, mirëpo nevojitet një proces negociator i bisedimeve, në mënyrë që ai propozim të bëhet marrëveshje. Ajo se çfarë ne theksojmë është që në njërën anë janë 33 marrëveshje të Brukselit nga dekada e kaluar dhe nuk ka asnjë marrëveshje e cila ka prioritet ndaj një marrëveshjeje tjetër”.

“Ndërmjetësit ndërkombëtarë vijnë me kërkesa të palës tjetër dhe kërkesat e palës tjetër janë iracionale. Andaj atyre unë duhet t’ua them vlerësimin e drejtë”, ka shtuar ai.

“U ktheva në Kosovë sot për t’i vazhduar diskutimet e mia të sinqerta, të hapura dhe intensive me kryeministrin Albin Kurti dhe zëvendëskryeministrin Bisnik Bislimin, për hapat e ardhshëm dhe rrugën përpara për normalizimin e marrëdhënieve me Serbinë. Ne gjithashtu u dakorduam që të gjitha marrëveshjet e kaluara të dialogut, të zbatohen plotësisht”.

Kujtojmë se të mërkurën mbrëma, emisari i BE-së për dialogun Kosovë-Serbi ka zhvilluar një darkë pune më kryeministrin Albin Kurti dhe zëvendëskryeministrin Besnik Bislimin dhe më pas në llogarinë e tij në Twitter ka postuar një fotografi ku ka thënë se është dakorduar që të zbatohen të gjitha marrëveshjet e kaluara.

Comodita Home nis epokën e franshizës në Belgjikë

Sponsoruar