Lajme

Kurti i shkruan Bërnabiqit dhe liderëve botërorë për manastiret kosovare

Autori: Gazeta inFokus 20:53 | 24 May 2021

Kryeministri i Kosovës, Albin Kurti, i ka dërguar letër kryeministres së Serbisë, Ana Bërnabiq.

Ajo është në mesin e 52 presidentëve dhe kryeministrave të po kaq vendeve që shefi i qeverisë nga Prishtina ua përcolli një letër që flet për mbrojtjen e trashëgimisë kulturore.

Letra – që zyrtarisht ende nuk është bërë publike – e datës 20 maj dhe e cila së pari u publikua nga media në gjuhën serbe “Kosovo Online” është dërguar në adresat kryesore politike gjithë andej botës.

-Advertisement-

Prej presidentit të Amerikës Joe Biden te kancelarja e Gjermanisë Angela Merkel, kryeministri i Rusisë Mikhail Misushtin e deri të sekretari i Selisë së Shenjtë në Vatikan.

Kurti u thotë liderëve botërorë se ka tentime që Kosova të paraqitet si rrezikuese e trashëgimisë kulturore, në veçanti kishat e manastiret ortodokse.

Kjo, sipas tij, nuk qëndron dhe po tentohet që trashëgimia kulturore të shfrytëzohet për përfitime specifike politike.

“Kosova është vend i sigurt. Shënimet nga raportet e institucioneve lokale e ndërkombëtare tregojnë se Kosova është njëri nga vendet më të sigurta e më paqësore në Evropë. Qytetarët e Kosovës respektojnë diversitetin kulturor për shkak se kjo është njëra nga vlerat më të shquara të shoqërisë kosovare”, thuhet mes tjerash në letër.