Lajme

Kurti flet pas demantit nga Hovenier: Me ShBA-të jemi miq, por s’pajtohemi për çdo gjë

Autori: Gazeta inFokus 14:49 | 19 February 2024

Kryeministri i Kosovës, Albin Kurti, ka theksuar se marrëdhëniet me Shtetet e Bashkuara të Amerikës (SHBA) janë të mira, edhe pse si aleatë, nuk do të thotë që pajtohen absolutisht çdo herë.

Ai ka shtuar se Qeveria e Kosovës ka për detyrë ta respektojë Rregulloren e Bankës Qendrore të Kosovës (BQK) që ndaloi përdorimin e dinarit serb.

“Unë nuk e kam thënë qëndrimin e asnjë shteti tjetër por si kryeministër i Republikës së Kosovës kam folur që raportet tona, bashkëpunimi jonë me SHBA-në është shumë i mirë. Tash që jemi partner, aleatë, miq, kjo nuk do të thotë që pajtohemi absolutisht çdoherë në çdo vend për gjithçka,” ka thënë Kurti.

-Advertisement-

Kjo ishte deklarata e parë e kryeministrit Kurti pas demantit të ambasadorit Jeff Hovenier ndaj qeverisë lidhur me rrezikun e prishjes së partneritetit mes ShBA-së dhe Kosovës. Të premten, Hovenier doli në një konferencë për media dhe i hodhi poshtë deklarimet e pushtetarëve se nuk ka rrezik të prishjes së partneritetit mes dy vendeve.

Në deklarimin e sotëm para mediave, Kurti ka theksuar po ashtu se do të shkojë në Bruksel nëse do ftohet për nënshkrim të marrëveshjes me Serbinë.

“Nëse na thërrasin për nënshkrim të marrëveshjes padyshim që shkoj. Unë jam treguar konstruktiv dhe i përkushtuar edhe atëherë kur na kanë thirrur në Bruksel e raundi i bisedimeve nuk mund të thuhet që ka qenë i suksesshëm. Unë këtë e bëj për BE-në, por e bëj edhe për shkak se duhet të kemi marrëdhënie normale me Serbinë,” ka thënë ai.

Ai ka folur edhe për marrëdhëniet me Serbinë, duke thënë se ajo nuk po armatoset për t’u mbrojtur, por përkundrazi.

“Ajo e blen për shkak të Kushtetutës së saj agresive dhe projekteve të saj serbomadhe. Në veçanti blen armatim nga Federata Ruse dhe nga Kina për bindjen time ajo dëshiron që t’i dëshmohet sidomos Kremlinit që është në vazhdimësi me politikën e Putinit pikërisht se është agresive ndaj Kosovës,” ka thënë ai.

Subscribe në YouTube: GAZETA INFOKUSI
Etiketa:
UFC EKSKLUZIVISHT NË ARTMOTION!

Të tjera

Fokusi

lajme