Lajme

Ku shkojnë paratë që po i paguajnë qytetarët në stacionin e autobusëve në Prishtinë?

Autori: Gazeta inFokus 12:53 | 09 July 2018

Çdo qytetar që udhëton me autobus nga stacioni i autobusëve në Prishtinë, është i detyruar të paguajë tarifën prej 10 centësh, duke marrë një biletë e cila u mundëson të kenë çasje në peronin e autobusëve.

Këto bileta, vazhdojnë të paguhen edhe kur aparatura për skanimin e tyre nuk funksionon. E kjo gjë po i irriton qytetarët, të cilët shprehen të pakënaqur.
Shumë qytetarë nuk e dinë se për çfarë saktësisht shërben kjo pagesë, e ka të atillë që mendojnë se kjo biletë do duhej të shërbente për të paguar edhe biletën e autobusit, duke siguruar kështu një ulëse.

S.P. e cila po udhëtonte nga Prishtina për në Pejë, të premten, pikërisht në ditën kur aparati i skanimit të biletave nuk funksiononte, tha për Gazetën Express se pavarësisht se kjo tarifë nuk i duket e lartë, nuk e di për çfarë shërben.

-Advertisement-

“Unë jam nga Peja, në Prishtinë kam ardhë për vizitë. Kur deshta me hy në stacion më thanë që nuk bën pa e pagu biletën. Mendova që e paguaj edhe biletën e autobusit, madje më erdhi mirë që kam mundësi me pagu biletë autobusi brenda në stacion, e kështu e kam të sigurt ulësen në autobus. Por jo, ajo biletë kishte qenë vetëm për stacion. E kur e bleva biletën, një punëtor që qëndronte tek aparati i skanimit të biletës, më tha: vazhdo se nuk po bon me i skanu”, thotë ajo për Gazetën Express.

E të shumtë janë qytetarët që qëndrojnë jashtë stacionit të autobusëve. Një prej tyre, për Gazetën Express ka thënë se këtë gjë e bën vetëm të mos e paguar biletën në stacion.

“Unë nuk hy në stacion me e pagu atë biletë, edhe pse 10 centë s’janë shumë, por unë nuk po e di ku po shkojnë. Ai aparati që duhet me i skanu biletat rrallë herë punon. Nëse e kisha ditë që këto të holla të biletave po përdoren për diçka të hairit, e kisha pagu. Unë udhëtoj çdo ditë prej Prishtinës në Gjilan, e nuk kam llogari me pagu të holla për biletë të stacionit kur as nuk po funksionon si duhet ky sistem”, shprehet B.A.

Gazeta Express ka kontaktuar me stacionin e autobusëve, mirëpo të njëjtit, pasi e kanë kuptuar për çfarë është fjala, kanë thënë se zyrtarja për komunikim më media ndodhet në pushim dhe nuk e dinë kur kthehet.

Subscribe në YouTube: GAZETA INFOKUSI