Lajme

Kryeziu flet për “modestinë” e Kurtit, tregon sa e paguan qiranë kryeministri

Autori: Gazeta inFokus 12:19 | 08 June 2022

Zëdhënësi i Qeverisë së Kosovës, Përparim Kryeziu, ka dhënë disa informacione lidhur me banimin e kryeministrit Albin Kurti, shkruan Gazeta Infokus.

Ai përmes një postimi në rrjetin social “Facebook”, është përpjekur që ta arsyetojë Kurtin duke treguar çmimin e “lirë” qirasë ai paguan për banim.

“Kryeministri Kurti paguan qira mujore prej 250 euro. Ai banon në shtëpinë e bashkatdhetarëve Blerim dhe Shega Zagragja që jetojnë në Drammen të Norvegjisë. Kryeministri i njeh ata që prej disa vitesh. Anëtarët e tjerë të familjes Zagragja i ka njoftuar më vonë, pasi që është bërë banor në Taslixhe”, ka shkruar zëdhënësi i qeverisë.

Madje Kryeziu ka treguar edhe sipërfaqen e shtëpisë ku i pari i qeverisë banon aktualisht, duke thënë se ajo nuk është plotësisht e shfrytëzueshme.

“Shtëpia në Taslixhe ku banon kryeministri nuk i ka 500 por 230 metra katrorë. Dhe kjo hapsirë nuk është plotësisht e shfrytëzueshme. Dy dhoma janë të papërdorshme, njëra është e bllokuar me gjësendet e pronarit e tjetra është dhomë e sigurisë. Shtëpia është e vjetër rreth 50 vjeç”, ka shkruar ai.

Zëdhënësi Kryeziu, e tregoi edhe arsyen se pse Kurti vendosi që të ndërrojë vendbanim vetëm pas pak kohësh pasi doli në krye të qeverisë, me arsyetimin se kjo ka ndodhur pas udhëzimeve të këshilltarëve të sigurisë të cilët kanë vlerësuar që mbrojtja e afërt dhe Policia e Kosovës kanë shumë vështirësi për përgatitjet dhe organizimin e sigurisë aty ku banonte Kryeministri te parku i qytetit./Gazeta Infokus/

Të tjera