Kryeministri Albin Kurti, ka folur rreth zhvillimeve të FFK-së dhe për procesin e zgjedhjes së kryetarit të këtij institucioni.

Kurti tha se komisionet përkatëse duhet ta vendosin legjitimitetin e kësaj ecurie.

“Unë besoj që komisionet përkatëse le ta vendosin legjitimitetin e procesit, por në shoqërinë tonë, më së shumti më dhemb kur krijohen këto grupacionet, që kritikën e shndërrojnë në kundërshtim, kurse kundërshtimin në armiqësi dhe e gjithë kjo në llogari të tërësisë”.

Shefi i Qeverisë tha se synimi i tij është që kritikat e tij mos të shndërrohen në armiqësi.

“Synimi im si kryeministër dhe kryetar i subjektit më të madh politik në Kosovë, është që kritikat tona mos t’i shndërrojmë në armiqësi dhe në anën tjetër të dëshmojmë që është e mundshme edhe të ruhet uniteti dhe të zhvillohet kritika. Sepse, kur po na duhet të zgjedhim midis kritikës dhe unitetit, aty përparim nuk ka”, shtoi kreu i VV-së në KTV.

Kryetari i Federatës së Futbollit të Kosovës, Agim Ademi, ka pranuar të martën se një organ i UEFA-s kishte marrë një vendim për dënimin e tij.

Pasi të martën FFK-ja mori letër nga UEFA, ku sqarohet se Agim Ademi tani nuk është i dënuar nga Konfederata Evropiane e Futbollit, i pari i futbollit kosovar pranoi se një vendim i UEFA-s është marrë për të.

Për kohë të gjatë Agim Ademi kishte mohuar që UEFA e ka dënuar atë. Madje të dielën në RTK kishte thënë se nuk ka letër të UEFA-s për dënimin e tij dhe nëse dikush e posedon atë, atëherë le ta bëjë publike. Menjëherë grupi opozitar i udhëheqjes aktuale të FFK-së nxori letrën për publik, ndërsa Agim Ademi tha më pas se ai vendim nuk ka hyrë në fuqi. Të martën megjithatë u konfirmua se vendimi ishte i plotfuqishëm dhe se ai ishte anuluar ndërkohë.

Më 20 gusht të vitit 2020, një organ i UEFA e kishte dënuar Ademin me largim nga futbolli deri më 31 dhjetor 2022, pasi ai u dënua me burg në Kosovë. Në kohën kur Ademi pritej të vuante dënimin, rasti i tij u kthye në rigjykim dhe kështu edhe UEFA e pezulloi vendimin dhe më pas e anuloi tërësisht.

Më 16 mars, Paparaci kishte raportuar ekskluzivisht për arrestimin e Agim Ademit, si i dyshuar nën dyshimin për sulm ndaj zyrtarit të FFK-së, Artan Govori.

I njëjti ishte liruar nga Prokuroria e Shtetit, ditën e nesërme.

Ademi është kandidati i vetëm në zgjedhjet e FFK-së.

Kjo pasi Komitetit Ekzekutiv i FFK-së, i konstatoi si jo-valide nënshkrimet e mbledhura prej Gramoz Vokrrit, për hedhjen e kandidaturës për kryetar.

Vokrri ka pretenduar se Agim Ademi qëndron prapa vendimit të Komitetit Ekzekutiv për eliminimin e tij nga gara për kryetar të FFK-së.

Zgjedhjet për kryetar të FFK-së ishin caktuar të mbahen më 6 prill të këtij viti, ku kandidat për të marrë postin e kreut të shtëpisë së futbollit kosovar ishte Gramoz Vokrri dhe Agim Ademi, ndërsa tani pas vendimit të KE në garë do të mbetet vetëm Agim Ademi. /Paparaci.com

Comodita në Las Vegas Market prezanton linjat e reja të dyshekëve për tregun amerikan

Sponsoruar