Lajme

Kryediplomati austriak: Jepni fund aksioneve policore në ndërtesat komunale në veri

Autori: Gazeta inFokus 15:21 | 23 June 2023

Ministri i Jashtëm austriak, Alexander Schallenberg ka thënë se situata aktuale në Kosovë është e paqëndrueshme dhe u ka bërë thirrje të dyja palëve që të marrin masa urgjente konkrete për të de-përshkallëzuar situatën dhe të riangazhohen në dialog.

Sipas Schallenberg, nëse palët nuk angazhohen, do të ketë pasoja negative.

“Pritjet e Bashkimit Evropian dhe Austrisë janë të qarta, veçanërisht ndaj Kosovës, e cila është thirrur për t’i dhënë fund aksioneve policore pranë ndërtesave komunale në veri, e cila duhet të sigurojë që kryetarët e komunave të kryejnë punën e tyre në vende të tjera dhe të organizojnë zgjedhje të reja sa më shpejt të jetë e mundur, në të cilën presim edhe pjesëmarrjen e serbëve në veri të Kosovës”, tha Shallenberg për mediumin serb, Kosovo-Online.

-Advertisement-

Ai vuri në dukje se të dyja palët tani duhet të ndërmarrin hapa për t’i dhënë fund “modës së krizës” dhe për të punuar për një zgjidhje të qëndrueshme brenda dialogut, nën udhëheqjen e Josep Borrell dhe Miroslav Lajçak.

Për këtë arsye, shefi i diplomacisë austriake e përshëndeti faktin që presidenti serb Aleksandar Vuçiq dhe kryeministri i Kosovës Albin Kurti, në bisedimet e djeshme me Borrell në Bruksel, ranë dakord për nevojën për zgjedhje të reja në katër komuna në veri të Kosovës.

Schallenberg theksoi në Forumin Evropian në Wachau se dialogu nuk ka alternativë dhe shtoi se përgjegjësia aktualisht është e Prishtinës, duke shtuar se situata ka ndryshuar në krahasim me 10 vjet më parë.

Në anën tjetër, ai ka deklaruar se arrestimi i policëve të Kosovës është i papranueshëm.

“Status quo-ja nuk mund të mbahet dhe Prishtina duhet të kuptojë se është e nevojshme të krijohet një situatë në të cilën të gjithë të ndjehen të sigurt”, tha Shallenberg.

Subscribe në YouTube: GAZETA INFOKUSI