Sport

Kriza e United, tifozët: Onana skandaloz, riktheni De Gean

Autori: Gazeta inFokus 10:10 | 04 October 2023

Manchester United u befasua sërish në “Old Trafford”. Këtë radhë nga Galatasaray, me kampionët e Turqisë që arritën një fitore historike 2-3 në stadiumin mitik.

Kjo ishte humbja e gjashtë mes Premier dhe Champions League për skuadrën e Erik ten Hag. Disfata të regjistruar në nëntë ndeshje!

Kriza ka pllakosur United, ndërkohë që tifozët kanë shigjetuar Andre Onanan si një ndër fajtorët kryesorë të kësaj ecurie negative.

-Advertisement-

Kamerunasi është hija e vetvetes krahasuar me sezonin e fundit, gjatë së cilit shkëlqeu me Interin. Duke dhënë kontribut të madh në mbërritjen e zikaltërve në finalen e Champions League.

Aventura në “Old Trafford” ka nisur keq për “gardianin” afrikan. Roli i portierit është delikat. Aspekti mental ka rëndësi të madhe për një rol të tillë.

Onana ka humbur qetësinë dhe është “pushtuar” nga pasiguria. Edhe ndaj Galatasarayt nuk ndihmoi aspak skuadrën e tij.

UNITED-GALATASARAY

Duke gabuar në pasimin për Casemiron, i cili shkaktoi penallti më pas. Por edhe në dalje apo pasime të thjeshta për shokët e skuadrës.

Dhe tifozët anglezë e kanë humbur durimin, teksa kanë nisur një fushatë në rrjetet sociale për rikthimin e David De Geas.

Spanjolli e mbylli me United gjatë merkatos së verës pas 12 viteve me “Djajtë e Kuq”. 32-vjeçari është ende pa skuadër, ndërkohë që tifozët e United e duan sërish me shtyllave të skuadrës së tyre të zemrës.

Subscribe në YouTube: GAZETA INFOKUSI