Lajme

Kosovari që shkoi në ISIS vazhdon ta akzuzojë Qeverinë

Autori: Gazeta inFokus 14:44 | 11 May 2017

Albert Berisha, djaloshi 30 vjeçar nga Prishtina që kishte shkuar për të luftuar në Siri dhe Irak, e i cili më pas ishte dënuar me burg nga organet e drejtësisë në Kosovë, ka folur sot rreth pjesëmarrjes së të rinjve në luftën e Sirisë.

Por, ai ka fajësuar Qeverinë se, siç thotë ai, ua ka trasuar rrugën për atje. Ai thotë se kanë qenë ministra, partnerë ndërkombëtarë, madje edhe presidentja që kishte bërë thirrje që të përkrahet opozita në Siri, shkruan gazetametro.net.

‘Nuk është se unë po du me u ba akuzues i përhershëm i Qeverisë. Por, diçka që është faktike, është faktike. Ministri i Jashtëm, me deklarata ka ba thirrje me përkrah opozitën siriane. Partnerët tanë ndërkombëtarë kanë ba thirrje me përkrah opozitën siriane. Presidentja i ka përkrah opozitën zyrtare. Ka pas pjesëtar të ushtrisë së lirë siriane që kanë marrë trajnim në Kosovë’, ka thënë Berisha.

-Advertisement-

Berisha pretendon se kanë qenë këto deklarata që në një mënyrë kanë ndikuar që të rinjtë të shkojnë në Siri.

‘Gjithë këto, direkt ose indirekt na kanë trasu rrugën për Siri. Nuk është një motiv. Është motivi njerëzor, fetar, politik’, ka thënë kosovari që iu kishte bashkuar ISIS’it.

Mirëpo, Berisha duke fajësuar Qeverinë dhe të tjerët se kishin mbështetur në një formë opozitën siriane, nuk sqaron se ai dhe të tjerët iu kishin bashkuar grupeve terroriste në Siri, e jo opozitës siriane.

Ndërkohë, për fund ai ka dhënë një, siç e quajti ai, mesazh për të rinjtë. Ndër të tjera, ai i fton ata të bëhen të dobishëm.

‘Mesazhi për të rinjtë është: lexoni sa më shumë për islam. Bëhuni të dobishëm për veten dhe për familjet tona, dhe bënu i dobishëm për shoqëri. Mos e fajësoni islamin për gabime tona’, ka shtuar ai.

Ndryshe, Kosova kishte pasur mjaft shumë qytetarë që iu kishin bashkuar grupeve ekstremiste në Siri e Irak. Duke llogaritur mesataren për kokë banori, Kosova llogaritet ndër vendet me më së shumti qytetarë që iu bashkuan grupeve terroriste

Subscribe në YouTube: GAZETA INFOKUSI