Kryeministri i Kosovës, Albin Kurti, sot ka propozuar para deputetëve të Kuvendit të Kosovës 6 kushte për themelimin e Asociacionit.

Derisa së fundi ka pasur presion ndërkombëtar që ai të formohet dhe për të cilin janë mbajtur takime, ky po shihet si ndryshim i qëndrimit të Kurtit lidhur me këtë temë, të cilën e ka kundërshtuar që nga nënshkrimi i marrëveshjes në Bruksel.

Kurti ka prezantuar këto 6 kushte:

1.Asociacioni duhet të jetë në përputhje me Kushtetutën dhe ligjet në fuqi në Republikën e Kosovës.

2.Asociacioni nuk mund të jetë monoetnik, duhet të ndërrojë emrin, nuk mund të ketë/bartë asnjë pushtet publik apo ekzekutiv dhe duhet t’i shërbejë vetëm bashkëpunimit horizontal të komunave sipas Kushtetutës dhe ligjit për vetëqeverisje lokale (kreu 5).

3.Të drejtat e pakicave kombëtare dhe mekanizmat mbrojtës përkatës duhet ta ngërthejnë parimin e reciprocitetit ndërmjet dy shteteve respektive si dhe të marrin parasysh standardet dhe modelet evropiane.

4.Para vendosjes së Asociacionit, strukturat ilegale të Serbisë në veri shuhen dhe bëhet dorëzimi i të gjitha armëve ilegale.

5.Asociacioni është pjesë e marrëveshjes finale dhe zbatohet pas njohjes reciproke. Dhe, vetëm pasi Serbia t’i ketë pranuar parimet e Kartës së Organizatës së Kombeve të Bashkuara në raportet e saj ndërshtetërore me Republikën e Kosovës.

6.Presidenti i Serbisë i tërheq letrat e dërguara te pesë shtetet anëtare të BE-së, dhe tek të tjerat, për mospranimin e aplikimit të Republikës së Kosovës për anëtarësim në Bashkimit Evropian që paraqet edhe shkelje të po asaj marrëveshjeje Thaçi-Daçiq të 19 prillit 2013.

Lidhur më këto kushte të kryeministrit, deputetja e LDK-së, Rrezarta Krasniqi, thotë se ato janë sinjale të qarta se ai është i gatshëm ta formojë Asociacionin dhe se ai është konsistent në ndryshim të qëndrimeve të tij.

“Kushtet për të cilat foli sot Kryeministri Kurti në Kuvendin e Republikës së Kosovës lidhur me formimin e Asociacionit, janë sinjale të qarta se ai është i gatshëm për të themeluar atë. Pra, kemi ndërrim qëndrimesh nga ana e tij, ngjashëm siç ka vepruar me çdo çështje tjetër prej që e ka marrë pushtetin. Pra, Kurti është treguar konsistent në ndërrimin e qëndrimeve”, thotë ajo për Gazeta Blic.

Sipas Krasniqit, Asociacioni duhet të formohet vetëm sipas verdiktit të Gjykatës Kushtetuese dhe çdo version tjetër do të kundërshtohet fuqishëm nga LDK.

“Megjithatë krijimi i Asociacionit mbetet i pranueshëm vetëm sipas verdiktit të Gjykatës Kushtetuese. Çdo propozim apo version tjetër anti-kushtetues do të kundërshtohen fuqishëm nga ne”, deklaron deputetja Rrezarta Krasniqi.

UFC EKSKLUZIVISHT NË ARTMOTION!

Sponsoruar