Lajme

Kelmendi: Organizata ekstremiste “Obraz” e ndaluar në Serbi, defilon lirshëm në Kosovë

Autori: Gazeta inFokus 08:04 | 29 June 2017

Derisa disa qytetarë serb të Kosovës dje janë mbledhur në Gazimestan për të shënuar përvjetorin e betejës së humbur nga Perandoria Osmane që njihet si ” Vidovdan”, e pranishme ishte edhe organizata ekstremiste “Obraz” e cila është e ndaluar të veprojë në Serbi.

Kështu ka thënë kryetari i Partisë Fjala, Gëzim Kelmendi. Sipas tij, vërtetë pjesëmarrja e kësaj organizate ekstremiste është e papranueshme për shtetin dhe institucionet tona.

“Por për çudi institucionet tona sot heshtën, heshtën edhe partitë politike dhe liderët politik. Turp i madh. Ne si Parti FJALA respektojmë çdo qytetar të Kosovës pavarësisht përkatësisë fetare dhe kombëtare, por nuk respektojmë organizatat ekstremiste që promovojnë dhunën dhe nxisin urrejtje ndërfetare dhe ndërkombëtare.

-Advertisement-

Njëherit iu bëjmë me dije se Kosova kurrë nuk ka qenë pjesë e Serbisë, por ka qenë e pushtuar nga Serbia. Kosova kurrë nuk ka ushtruar gjenocid dhe vrasje të popullatës civile, por ka qenë regjimi i Serbisë ai i cili terrorizoj dhe ushtroj gjenocid mbi popullin e Kosovës.

Partive politike dhe liderëve politik të Kosovës iu themi se mos u frikësoni të reagoni. Se heshtja juaj e sotme dëshmon se për karrikën e pushtetit, ju i mbyllni sytë dhe gojën përballë organizatave ekstremiste nga Serbia. Mos shkelni mbi gjakun e dëshmorëve tanë, por mbroni Kosovën dhe popullin e Kosovës”, ka thënë ai.

Subscribe në YouTube: GAZETA INFOKUSI