Lajme

KDI organizon vizitën e parë të deputetëve në Prokurorinë Themelore në Mitrovicë

Autori: Gazeta inFokus 15:42 | 27 November 2017

Instituti Demokratik i Kosovës (KDI) ka organizuar sot, vizitë për deputetët e Kuvendit të Kosovës: Xhevahire Izmaku, Sami Kurteshi, Shkumbin Demaliaj në Prokurorinë Themelore të Mitrovicës ku u pritën nga kryeprokurori, Shyqyri Syla.

“Kryeprokurori Syla, njoftoi deputetët rreth hapave të ndërmarrë për zbatimin e marrëveshjes së drejtësisë, integrimin e sistemit prokurorial dhe sfidat me të cilat po përballen. Ai tha se janë të angazhuar 21 prokurorë, përkatësisht 10 prokurorë serb dhe 11 prokurorë shqiptar të cilët do të operojnë në bazë të ligjeve të Kosovës. Ai shtoi se ndarja e lëndëve në Prokurori do të bëhet me short dhe tashmë është filluar të punohet.

Deputetët e Kuvendit të Republikës së Kosovës takuan edhe prokurorët nga të dy komunitetet, si dhe shprehën gatishmërinë e tyre për të ndjekur në vazhdimësi procesin e integrimit të sistemit të drejtësisë, duke kërkuar që ky proces të bëhet në bazë të ligjeve dhe kushtetutës së Kosovës”, thuhet në njoftimin për media.

-Advertisement-

Pas vizitës në terren, me organizim të KDI-së , deputetët e Kuvendit të Republikës së Kosovës, Xhevahire Izmaku, Sami Kurteshi, Shkumbin Demaliaj, morën pjesë në debat publik me banorët e fshatrave të rajonit të Mitrovicës . Qëllimi i këtij debati ishte për të parë nga afër ndikimin e marrëveshjeve të dialogut Kosovë-Serbi në jetën e qytetarëve të këtij rajoni, sfidat me të cilat përballen dhe kërkesat që ata kanë për përmirësimin e jetës së tyre.

Në këtë debat u theksua nevoja e rritjes së transparencës dhe përfshirjes më të madhe të qytetarëve në procesin e dialogut Kosovë-Serbi. Banorët e fshatrave të rajonit të Mitrovicës u shprehen të pakënaqur me rezultatet e dialogut deri më tani dhe po ashtu me mungesën e kushteve për kthim në vendbanimet e tyre në fshatrat dhe lagjet që i takojnë Mitrovicës së Veriut, Zubin Potokut dhe komunave tjera të kësaj ane. Ata gjithashtu shprehën shqetësimin e tyre për strukturat e mbetura paralele në sistemin e arsimit, të shëndetësisë dhe mos respektimin e obligimeve ndaj shtetit të Kosovës.