Rr. M., i dëmtuari i procesit gjyqësor kundër dy të akuzuarve për vjedhje grabitqare, ishte kapur për dritaren e makinës së të akuzuarve për të shpëtuar 1 mijë frangat që ua dha.

Rr. M. Ishte duke lëvizur me biçikletën e tij në qytetin e Pejës kur një makinë në të cilën ndodheshin të akuzuarit Senad Mehmeti e Ollga Mekiq ndaloi afër tij. Të akuzuarit nga makina e pyetën çiklistin nëse kishte 2 mijë franga për t’i kthyer në euro.

I akuzuari sipas aktakuzës, u tha se kishte vetëm 1 mijë franga për t’i konvertuar në euro, ndërsa këto para ia dha të akuzuarës Mekiq.

Prokuroria pretendon se kur Senad Mehmeti e pa që paratë i ka në dorë Ollga Mekiq, u nis me makinë në drejtim të tregut të Pejës, ndërsa i dëmtuari u kap për dritaren e makinës duke u munduar të shpëtojë paratë që ia dha të akuzuarës.

Në aktakuzë sqarohet se Ollga Mekiq e kishte nxjerrë një sprej me të cilin e kishte spërkatur në sy të dëmtuarin Rr. M., i cili pastaj ishte rrëzuar dhe shkëputur nga makina, ndërsa të akuzuarit për vjedhje grabitqare kishin vazhduar të papenguar rrugën.

Në seancë, Senad Mehmeti dhe Ollga Mekiq, pas leximit të aktakuzës nga prokurorja Sahide Gashi, pranuan fajësinë për veprën me të cilën ngarkohen.

Pastaj në fjalën përfundimtare prokurorja Gashi tha se në bazë të provave të cilat i posedon prokuroria dhe pas pranimit të fajësisë është vërtetuar se të akuzuarit janë kryerës të vjedhjes grabitqare dhe i propozoi gjykatës që ata të dënohen sipas ligjit.

Arben Kelmendi, avokati i Senad Mehmetit kërkoi dënim të butë të të mbrojturit të tij duke përmendur si rrethanë lehtësuese pranimin e fajësisë.

“Pas pranimit të fajësie nga i mbrojturi im për veprën penale për të cilën u ngarkua, kërkoj nga gjykata që pranimin e fajësisë ta merr si rrethanë lehtësuese dhe ndaj klientit tim të shqiptojë një dënim sa më të butë sepse ai dënim do ta arrinte qëllimin”, tha avokati Arben Kelmendi.

I akuzuari Mehmeti në gjykatë shprehu pendesë për veprën e kryer.

“Pas pranimit të fajësisë nga e pandehura dhe duke pasur parasysh rikualifikimin e aktakuzës, mua nuk me mbetet gjë tjetër veç të kërkoj nga ana e gjykatës që gjatë marrjes së vendimit të shqiptojë një dënim nën minimumin e paraparë ligjor, duke pasur parasysh pendimin për kryerjen e veprës penale si dhe gjendjen e rëndë ekonomike”, tha Kelmendi.

Edhe Ollga Mekiq tha se në këtë situatë erdhi nga gjendja e rëndë ekonomike.

Gjykata pastaj dënoi Senad Mehmetin e Ollga Mekiqin me nga dy vjet burg dhe nga 250 euro gjobë. Të dënuarit u obliguan edhe ta kompensojnë për dëmin të dëmtuarin Rr. M.

Senad Mehmeti e Ollga Mekiq disa javë më parë u dënuan me burgim nga Gjykata Themelore në Mitrovicë në një proces tjetër gjyqësor ku akuzoheshin për mashtrim.

Birra të ftohta e me shumë ZBRITJE veç në Viva Fresh!

Sponsoruar