Lajme

Juristi kosovar: Është befasues reagimi i shpejtë i Gjykatës Kushtetuese

Autori: Gazeta inFokus 12:28 | 01 May 2020

Edhe pse jashtë orarit zyrtar të punës, Gjykata Kushtetuese e Kosovës ka regjistruar kërkesën e parashtruar nga Vetëvendosje, fillimisht për pezullim të votimit të qeverisë Hoti, e më pas edhe për kushtetueshmërinë e vendimit të Presidentit për të mandatuar Avdullah Hotin për kryeministër.

Në një lidhje të drejtpërdrejtë për Euronews Albania, juristi Kushtrim Palushi e quajti pozitiv reagimin e Gjykatës Kushtetuese dhe komentoi situatën aktuale politike në Kosovë.

“Akreditimi i Avdullah Hotit për kryeministër ka qenë i pritshëm nga ana e presidentit Thaçi, për shkak se kjo gjë është ditur tashmë që do të ndodhë, mirëpo ka qenë befasues reagimi aq i shpejtë i Gjykatës Kushtetuese, ku pritet që edhe sot pasdite të japë një verdikt fillestar rreth seancës të së shtunës dhe më pas pritet vendimi final i saj, diku nga data 10 maj. Mendoj që është pozitiv reagimi i Gjykatës Kushtetuese sepse po të mos ndodhte kjo, mund të krijohej një rrezik tjetër, pra që qeveria Kurti të mos i lëshonte vendet që ka dhe kjo më pas mund ta thellonte krizën, jo vetëm politikisht, por mund të kishte dhe acarime të ndryshme qoftë përmes protestave apo ngjarjeve të ngjashme”, u shpreh Palushi.

Ai gjithashtu diskutoi dhe rreth teorive që kanë qarkulluar ditën e djeshme për shfrytëzimin e pushimit nga ana e institucioneve shtetërore, në mënyrë që të votohej qeveria e re.

-Advertisement-

“Ka patur konspiracione që ditën e enjte pasdite ka ndodhur akreditimi në mënyrë që sot, ditën e premte që është 1 maji dhe institucionet nuk punojnë, Gjykata Kushtetuese ta ketë të pamundur ta shqyrtojë kërkesën. Nesër që është e shtunë, po ashtu ditë pushimi sipas teorive qeveria mund të votohet në Kuvend, të bëhet çështje e kryer dhe pastaj Gjykata Kushtetuese të vendoset përpara një vendimi të kryer. Unë nuk mendoj se ka qenë një skenar i përgatitur për shkak se Gjykata Kushtetuese ka vendosur tashmë ta shqyrtojë këtë, kështuqë konspiracionet e këtij skenari kanë rënë poshtë”, tha Palushi.

Subscribe në YouTube: GAZETA INFOKUSI