Lajme

Ismaili: Kurti po na tregon se nuk mund t’i largojë Berishajn dhe Krasniqin

Autori: Gazeta inFokus 15:02 | 10 May 2023

Uran Ismaili nga Partia Demokratike e Kosovës ka thënë se kryeministri Albin Kurti me veprimet e tij po tregon se nuk mund t’i largojë ambasadorin e Kosovës në Kroaci, Martin Berishajn dhe ish-kryeshefin e KEK-ut Nagip Krasniqin.

Sipas tij, asnjë qeveritar e asnjë deputet i Lëvizjes Vetëvendosje nuk po e ka guximin të shtrojë pyetjen se pse një njeri i korruptuar nga Serbia lartësohet vazhdimisht nga Kryeministri Kurti.

“Ka gënjyer nën betim para komisionit hetimor të Kuvendit të Kosovës. Ka mbajtur fshehtë transaksionet e dyshimta bankare. Është paguar 4 milionë euro nga GEN-i i Serbisë edhe pse kompania e tij e kishte të regjistruar vetëm atë si punëtor”.

-Advertisement-

Tutje, Ismaili ka shtuar se çdokush tjetër përpos Martin Berishajt sot do të ishte në bankën e të akuzuarave.

“Vetëm njëra nga veprat e lartpërmendura janë bazë e mjaftueshme për shkarkim e arrestim. Por Martin Berishaj vazhdon të privilegjohet në pushtet. Hiç më larg se dje, ai u lartësua nga Kryeministri Kurti në pritjen solemne të Ministrit të Jashtëm Kroat, Gordan Grlić Radman”.

“Martini shihet përkrah flamurit të Kosovës si Ambasador fuqiplotë. Sfidon ligjet e Kosovës me pushtetin politik që ia dhuron Kryeministri Kurti dhe me paratë e pista ai duket se ka blerë heshtjen brenda Qeverisë dhe brenda Vetëvendosjes”.

“Asnjë qeveritar e asnjë deputet i Lëvizjes Vetëvendosje nuk po e ka guximin të shtrojë pyetjen se pse një njeri i korruptuar nga Serbia lartësohet vazhdimisht nga Kryeministri Kurti?! Pse ky ofendim ndaj flamurit e shtetit? Pse ky moszbatim i ligjit?”

“Kryeministri Kurti duke mbrojtur dhe arsyetuar Martinin e Nagipin nuk është duke i pastruar ata, por po na tregon haptas që ai nuk mundet t’i largojë. E kjo është tregues i rëndësishëm për këtë Qeveri”, ka shkruar Ismaili në llogarinë e tij në Facebook.

Subscribe në YouTube: GAZETA INFOKUSI
Etiketa:
Oferta speciale deri në 70% dhe ekstra zbritje në dyshekët Comodita
-Advertisement-

Të tjera

Fokusi

lajme