Sport

Higuain, te Milani për të thyer “mallkimin” e numrit 9

Autori: Gazeta inFokus 13:06 | 03 August 2018

Mund të quhet një “mallkim” apo një “paradoks”, por është një statistikë e bezdisshme që ngadhënjen prej 7 vitesh mes zhgënjimeve të shumta.

Te Milani ekziston një fanellë, ajo e qendërsulmuesit, që në 7 sezonet e fundit nuk ka arritur kurrë të shënojë mbi 10 gola në Serie A, përkundrazi, vetëm në një rast ka kaluar 5 golat në kampionat, e ai është Lapadula me 8 gola në sezonin 2016-2017.

Që prej lamtumirës së Pippo Inzaghit në vitin 2012, numri 9 i kuqezinjve është mbajtur mbi shpinë nga disa lojtarë të tjerë, por në çdo rast rezultati ka qenë negativ, për të mos thënë një zhgënjim total.

-Advertisement-

Tashmë do t’i takojë argjentinasit Higuain, i cili do t’i rrëmbejë numrin 9 portugezit Andre Silva, në kërkim për të thyer këtë tendencë negative.

Në verën e vitit 2001, Milani do të blinte nga Juventusi Filippo Inzaghin, i cili në 11 sezone me numrin 9 mbi shpinë do të kontribuonte në shkrimin e faqeve më të rëndësishme të historisë së “djallit”.

Pasuesi i tij i parë do të ishte Pato në vitin 2012, i cili e mbylli me zero gola sezonin, përpara se t’ia dorëzonte atë numër Alessandro Matrit, i cili ndonëse bëri më mirë sesa braziliani, nuk shënoi më shumë sesa 1 gol. E njëjta shifër edhe për Fernando Torresin vitin pasardhës, ndërsa Mattia Destro do të ndalej në kuotën e 3 golave.

Në sezonin 2015-2016, në Milano do të zbarkonte Luiz Adriano, por edhe ky brazilian do të linte pak gjurmë, me 6 gola gjithsej dhe 4 në kampionat, përpara se fanella me numrin 9 të kalonte te Lapadula. Ky i fundit rezultoi sulmuesi më i mirë në 7 vitet e fundit, me 8 gola në Serie A.

Sezonin e kaluar, blerja e re me shumë bujë Andre Silva do të ndalej në vetëm 2 gola në kampionat dhe 8 në Europa League; shumë pak për një fanellë që për “djallin kuqezi” do të thotë histori.

Në 138 ndeshje në total, 7 lojtarët e fundit që kanë mbajtur numrin 9 të Milanit kanë shënuar vetëm 31 gola. Në të njëjtën periudhë, Higuain i vetëm ka shënuar 164 gola. Por, a përbën ky një sinjal apo sfidë, e cila do të ketë një tjetër protagonist, duke qenë se do të jetë pikërisht “El Pipita” që do të mbajë këtë fanellë për sezonin e ri?

Qendërsulmuesi titullar i Juventusit kalon tashmë te Milani, plot 17 vite pas Inzaghit.

Subscribe në YouTube: GAZETA INFOKUSI
Etiketa:

Të tjera

Fokusi

sport