Lajme

Haxhiu do të raportojë për marrëveshjen e qelive me Danimarkën

Autori: Gazeta inFokus 07:57 | 22 December 2021

Marrëveshja e nënshkruar mes Republikës e Kosovës dhe Mbretërisë së Danimarikës për shfrytëzimin e qelive nga kjo e fundit, ka bërë që ministrja e Drejtësisë, Albulena Haxhiu të ftohet në Komisionin për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit.

Haxhiu do të raportojë përpara deputetëve pjesë e këtij Komisioni në lidhje me këtë marrëveshje në mbledhjen e sotme që pritet të nisë në ora 13:00.

“Gatishmëria e Mbretërisë së Danimarkës për t’ia besuar Kosovës transferin e të dënuarve, dëshmon përparimin që vendi ynë ka bërë në respektimin e të drejtave të njeriut dhe përkushtimin tonë për të quar më tej reformat në sundimin e ligjit, sikurse edhe ngritjen e marrëdhënieve tona në një nivel shumë të lartë. Kështu, MD e Republikës së Kosovës ka rënë dakord që t’i ofroj kapacitetet e saj korrektuese në qendrën e paraburgimit në Gjilan për Ministrinë e Drejtësisë së Mbretërisë së Danimarkës për vendosjen e deri 300 të dënuarve për një periudhë deri 5 plus 5, pra gjithsej 10 vjeçare”, pati deklaruar Haxhiu pas ceremonisë së nënshkrimit të marrëveshjes me homologun e saj danez.

-Advertisement-

Ndërsa ministri danez i Drejtësisë, Nick Haekkerup, pati thënë se përmes kësaj marrëveshjeje do të përfitojnë të dyja shtetet.

“Ne e shohim si një gurthemel për marrëveshjet e ardhshme dhe një shenjë e bashkëpunimit të ngushtë ndërmjet Republikës së Kosovës dhe Mbretërisë së Danimarkës. Është një marrëveshje që mendoj që do të përfitojnë të dyja palët. Pra, Shërbimi Korrektues i Danimarkës është i mbingarkuar dhe ne kemi kontaktuar Kosovën para një viti dhe kemi zhvilluar një dialog i cili ka filluar nga qeveria e kaluar në Kosovë, mirëpo pozitivisht është vazhduar me qeverinë aktuale. Unë mendoj se kjo marrëveshje me shpresë do të zgjidh në masë të madhe të problemeve të cilat i kemi me burgjet në Danimarkë dhe gjithashtu shpresoj që kjo do t’i mundësojë Kosovës që të investoj në sistemin e burgjeve të saj dhe të vazhdojë të zhvillojë kapacitetet e saj në sundimin e ligjit”, deklaroi ai ditë më parë.

Subscribe në YouTube: GAZETA INFOKUSI