Lajme

Haradinaj dërgon porosi nga Amerika: Kufijtë e Kosovës nuk ndryshohen

Autori: Gazeta inFokus 17:39 | 29 September 2018

Kryeministri i Kosovës, Ramush Haradinaj nga Amerika ka dërguar porosi se kufijtë e Kosovës nuk do të ndryshohen.

Haradinaj përmes një postimi në facebook ka shkruar se këtë qëndrim e ka ripërsëritur edhe gjatë qëndrimit të tij në Amerikë, shkruan gazeta inFokus.

“Unë këto ditë në Amerikë kam përçuar porosinë e popullit të Kosovës se kufijtë e Kosovës janë ata të 17 shkurtit të vitit 2008 dhe se e ardhmja e Kosovës nuk do të ndërtohet duke cenuar sovranitetin e saj me kompromise territoriale.”, ka shkruar ai.

-Advertisement-

Teksa i ka falënderuar protestuesit për kulturën e treguar ka shkruar se Kosova është në rrugën e drejtë për transformimin e FSK-së në ushtri.

“I falënderoj protestuesit për kulturën qytetare të treguar gjatë protestës së sotme. Përshëndes shprehjen e shqetësimit të një numri kaq të respektueshëm të qytetarëve të Kosovës për çështje që janë jetike për të ardhmen e vendit. Shteti i Kosovës është në rrugën e drejtë të kompletimit të kapaciteteve të saja kushtetuese, veçanërisht të transformimit të FSK-së në ushtri, dhe për këtë kemi përkrahjen e aleatëve strategjikë të Kosovës.”, ka përfunduar ai.

Ndryshe gjatë ditës mijta qytetarë kanë protestuar në Prishtinë kundër idesë që Kosova të përfaqësohet nga Thaçi në dialog me Serbinë dhe në këtë dialog të bisedohet për këmbim territori Kosovë-Serbi./inFokus.

Subscribe në YouTube: GAZETA INFOKUSI