Lajme

Gucati: Kurti më rrejti në zyrën time, është veteran fals

Autori: Gazeta inFokus 22:26 | 25 December 2024

Ish-kreu i OVL-UÇK-së, Hysni Gucati, ka akuzuar kryeministrin Albin Kurti, duke thënë se ai e ka mashtruar popullin dhe organizatat e dala nga lufta me premtime të rreme.

Gucati ka theksuar se Kurti kishte qëndruar në zyrën e tij disa muaj para arrestimit dhe i kishte premtuar se, si kryeministër, asnjë pjesëtar i Ushtrisë Çlirimtare të Kosovës (UÇK) nuk do të përballej me Gjykatën Speciale.

Ai ka shprehur shqetësimin se Kurti, si kryeministër, nuk ka dhënë asnjë mbështetje për shoqatat e dala nga lufta, duke e quajtur këtë një tradhti ndaj luftëtarëve.

-Advertisement-

“Kurti ka qenë në zyrën time dhe më ka rrejtur në zyrën time katër muaj ose pesë pa u arrestuar. E kam fotografinë, kam dëshmitarë, kur Albin Kurti më thotë që nëse unë vijë si kryeministër asnjë pjesëtarë i Ushtrisë Çlirimtare të Kosovës nuk do t’i përgjigjet Gjykatës Speciale, kam dëshmitar edhe katër burrat të tjerë. Kurtin nuk dua ta shoh në pushtet për rrenat dhe mashtrime që ia ka bërë këtij populli dhe neve si organizatë. Kurti asnjë cent nuk i ka dhënë për shoqatat e dala nga lufta”, ka deklaruar Gucati në RTV Dukagjini.

Në lidhje me statusin e Kurtit si veteran, Gucati ka deklaruar se Kurti nuk ka librezë të veteranit.

“Jo, nuk ka librezë të veteranit, ka pasur kërkesë, është pranuar si veteran i luftës, është veteran fallc i luftës. I vetmi njeri që e njoh si veteran fallc është Albin Kurti. Është i burgosur, peng lufte, nuk është i burgosur politik që i thotë vetit, është gënjeshtër e madhe, është marr peng si plotë qytetarë tjerë, ku ka qenë edhe daja im edhe axha im, ata nuk janë veteran vetëm pse ka qenë në burg”, ka deklaruar ai.

Gucati ka theksuar se Kurtin nuk e dëshiron në pushtet “për shkak të gënjeshtrave dhe mashtrimeve që ai ka bërë ndaj popullit dhe luftëtarëve të UÇK-së”.

Subscribe në YouTube: GAZETA INFOKUSI