Lajme

Grenell reagon pas thirrjes së ShBA-ve për themelimin e Asociacionit

Autori: Gazeta inFokus 10:00 | 09 November 2022

Ish-emisari i Shteteve të Bashkuara të Amerikës për dialogun, Richard Grenell ka falënderuar Sekretarin e Shtetit, Antony Blinken, për siç ka nënkuptuar ai, mesazhin për zbatimin e Marrëveshjes për Normalizimin Ekonomik mes Kosovës dhe Serbisë.Zëdhënësi i Departamentit Amerikan të Shtetit, Ned Price bëri thirrje “të zbatohen marrëveshjet që tashmë janë nënshkruar përmes procesit të dialogut”.

Duke folur për The Pavlovic Today, një medium të udhëhequr nga gazetarja me origjinë serbe, Ksenija Pavlovic, Grenell përshëndeti qasjen e Departamentit të Shtetit në procesin dialogues mes Kosovës dhe Serbisë.

“Dua të falënderoj Sekretarin e Shtetit Blinken që e tha shumë qartë se Kosova dhe Serbia duhet të zbatojnë Marrëveshjet Grenell-Trump për Normalizimin Ekonomik”, tha Grenell. “Derisa Administrata e Biden-it i përqafoi marrëveshjet shumë herët, unë besoj se ata duhet të shpenzojnë më shumë energji në zbatimin e këtyre marrëveshjeve historike.”

-Advertisement-

Ned Price tha të martën se Kosova dhe Serbia duhet të zbatojnë të gjitha marrëveshjet e arritura në bisedimet e lehtësuara nga Bashkimi Evropian përfshirë edhe atë për themelimin e Asociacioni të komunave me shumicë serbe.Në konferencën e përditshme me gazetarë zoti Price tha se Shtetet e Bashkuara pajtohen me vlerësimin e Bashkimit Evropian se zhvillimet e fundit në veriun e Kosovës janë shqetësuese.

“Ato vënë në rrezik përparimin e rëndësishëm që është arritur në dialogun e lehtësuar nga BE-ja. Largimi i serbëve të Kosovës nga institucionet e Kosovës nuk është zgjidhje për mosmarrëveshjet aktuale dhe ka potencial për ta përshkallëzuar më tutje situatën në terren. Të gjitha palët duhet të ndërmarrin hapa për të ulur tensionet dhe për të siguruar paqe dhe qëndrueshmëri”, tha zoti Price.

Subscribe në YouTube: GAZETA INFOKUSI