Lajme

Gjetja e mbetjeve mortore të tre personave në veri, trupat pritet t’iu dorëzohen familjeve pas rezultateve të ADN-së

Autori: Gazeta inFokus 08:24 | 13 July 2023

Dje nga Komisioni Qeveritar për Persona të Zhdukur është bërë e ditur se janë gjetur mbetje mortore, të së paku 3 personave, që sipas ekspertëve mjeko-ligjor, mund t’i përkasin luftës së fundit në Kosovë. E këto eshtra janë gjetur gjatë gërmimeve të djeshme në vendin e quajtur “Vidimiriq”, në veri.

Sipas njoftimit të këtij komisioni, kjo me saktësi do të konfirmohet pas bërjes së testeve të ADN-së.

“Krahas gërmimëve në lokacione të ndryshme në Republikën e Kosovës (si: Prishtinë, Podujevë dhe Kamenicë), sot ekipet tona të IML-së dhe Policisë së Kosovës, kanë vazhduar gërmimet në lokacionin e quajtur ‘Vidimiriq’, Veriu i Kosovës. Ne kemi hasur në mbetje mortore, të së paku 3 personave, që sipas ekspertave tonë mjekoligjor, mund t’i përkasin luftës së fundit në Kosovë. Pas ekzaminimit më të hollësishëm, dhe pas konfirmimit të ADN-së, do t’iu njoftojmë me saktësi për rezultatet e këtyre gjetjeve. Komisioni Qeveritar për Persona të Zhdukur mbetet i përkushtuar për të trajtuar me seriozitet të lartë, çdo informacion të mundshëm në lidhje me zbardhjen e fatit të personave të zhdukur”, thuhet në njoftimin e tyre.

-Advertisement-

Ministrja e Drejtësisë, Albulena Haxhiu më pas deklaroi se pas pranimit të rezultateve të ADN, trupat do t’iu dorëzohen familjarëve.

“3 trupa të gjetur sot në Vidimiriq të Mitrovicës së Veriut! Ekspert nga IML, përfaqësues nga KQPZH të shoqëruar nga policia, EULEX dhe ICRC, kanë arritur të bëjnë zhvarrimin e tre trupave në Vidimiriq të Mitrovicës së Veriut, persona të zhdukur nga lufta e fundit në Kosovë. Pas pranimit të rezultateve të ADN, trupat do t’iu dorëzohen familjarëve. Falënderoj ekipin për angazhimin. Nuk do të ndalemi deri sa të zbardhet fati i të gjithë personave të zhdukur nga lufta e fundit në Kosovë!”, ka thënë Haxhiu.

Subscribe në YouTube: GAZETA INFOKUSI
Risi në foleja.com! Prej 49.99€ bleni dyshekët Nouve Blanc dhe përfitoni transportin falas me DHL
-Advertisement-

Të tjera

Fokusi

lajme