Gazetarja dhe aktivistja Anita Nikaj ka reaguar publikisht pas kërcënimeve dhe sulmeve që thotë se ka marrë pas angazhimit të saj në protestat për drejtësi për Arlinda Zekajn, e cila u vra në Pejë, shkruan Gazeta Infokus.

Nikaj ka bërë të ditur se kërcënimet virtuale, përfshirë thirrjet për vrasje dhe përdhunim, kanë kaluar edhe në kanosje fizike ndaj saj, ndërsa rastet tashmë i ka denoncuar në Policinë e Kosovës.

“Kërcënimet virtuale dhe thirrjet për vrasje e përdhunim kanë kaluar edhe në kanosje fizike ndaj nesh, duke nisur prej meje. Rastet tashmë i kam dorëzuar në polici. Personat e përfshirë kanë emra dhe mbiemra. Me ju tash merret policia!”, ka shkruar Nikaj.

-Advertisement-

Ajo ka akuzuar persona që nuk i ka identifikuar se, në vend të kërkimit të përgjegjësisë institucionale për vrasjen e Arlindës, kanë zgjedhur të sulmojnë aktivistet që po kërkojnë drejtësi.

“Pas vrasjes së Arlinda Zekajt, në vend që vëmendja të përqendrohet te përgjegjësia institucionale, te dështimet në mbrojtjen e grave dhe te nevoja për drejtësi, ju keni zgjedhur një strategji tjetër: sulmi ndaj atyre që kërkojnë llogari”, ka deklaruar ajo.

Nikaj ka reaguar edhe ndaj pretendimeve që kanë qarkulluar për angazhimin e saj profesional, duke sqaruar se kontrata e saj me Nacionalen është ndërprerë para gati dy vitesh. Ajo ka paralajmëruar se edhe për shpifjet e pretenduara do të ndjekë rrugët ligjore.

Gazetarja ka theksuar se angazhimi i saj për të drejtat e grave dhe të njeriut nuk ka nisur me protestat e fundit, por është pjesë e aktivizmit të saj prej më shumë se një dekade.

Sipas saj, është e papranueshme që personat me pushtet institucional të merren me sulmimin e aktivisteve, në vend që të përmbushin përgjegjësitë e tyre.

“Propaganda dhe nxitja e urrejtjes ndaj nesh nuk janë përgjigje ndaj kërkesave për drejtësi. Ato janë pjesë pikërisht e mendësisë e sistemit që e ka vra Arlindën, dhe gratë tjera”, ka shkruar Nikaj.

Pavarësisht kërcënimeve, ajo ka bërë të qartë se nuk do të tërhiqet nga protestat dhe kërkesat për përgjegjësi institucionale.

“Për sa kohë gratë vazhdojnë të vriten në këtë vend, unë nuk do të hesht. Nuk mund të zmbrapset protesta, ndërsa dështimi institucional të mbetet pa pasoja”, ka përfunduar ajo.

Nikaj ka bërë thirrje për pjesëmarrje në protestën e sotme, e cila është paralajmëruar të mbahet në orën 17:00, në sheshin “Zahir Pajaziti” në Prishtinë.

Udhëto nga Suedia drejt Kosovës me PrishtinaTickets

Sponsoruar

-Advertisement-