Lajme

Gazetari Smajli: Të vihen në shërbim konsullatat për të votuar mërgata

Autori: Gazeta inFokus 19:00 | 13 January 2021

Gazetari Maxhun Smajli ka thënë se mërgimtarët do të mund të votonin në konsullatat e Kosovës dhe s’do t’iu mohojë e drejta e tyre kushtetuese. Ai u ankua se diaspora shqiptare është injoruar plotësisht nga shteti i Kosovës, që sipas tij, u krijua pikërisht nga mërgata.

“Janë dy shtete në botë që janë krijuar nga mërgata: Izraeli dhe Kosova. Mërgata shqiptare është injoruar përkundër punës së madhe që e kemi bërë. Në vitet e 90-ta në çdo rrymë dhe në çdo pore të jetës ishte diaspora ajo që e mbante”.

“Për këto 21 vjet shteti ynë s’e ka dhënë as më të voglën shenjë për t’i nderuar apo vlerësuar punën që e kanë bërë. Tash e keni parë që edhe po ofendohen. Mërgata shqiptare duhet të përfillet edhe në zgjedhje dhe për këtë duhet të viheshin në shërbim edhe konsullatat”.

Smajli ka thënë se do të ishte dërrmuese që të kërkohej që diaspora të vijë në Kosovë për të votuar, duke shtuar edhe sfidat në udhëtim nga pandemia.

“Nëse vota e mërgatës kushtëzohet në forma të ndryshme atëherë i bie që po privohen nga e drejta e votës. Në konsullata është një mundësi e mirë. Pse i kemi këto konsullata këtu?”.

Smajli ka thënë se disa nga shqiptarët që punojnë atje e kanë thuajse të pamundur që të hapin telefonin për t’iu përgjigjur KQZ-së sepse në vendet ku punojnë ka rregulla që ia ndalojnë një gjë të tillë.

“Për shembull në fabrikën e BMË-së të gjitha gjërat duhet lënë jashtë, përfshirë telefonin. Pra është e pamundur të kontaktohet për t’u verifikuar”.

Gazetari, që ka raportuar edhe gjatë luftës në Kosovë, ka thënë s’duhet të ketë shumë shqetësime për mundësinë e manipulimit të procesit zgjedhor në diasporë, meqë brenda në Kosovës është shumë më i madh.

Ai thotë se bashkatdhetarë derisa nuk kanë interes të drejtpërdrejtë nga zgjedhjet e Kosovës atëherë edhe qëllimin e kanë për të mirën e saj dhe jo për ta dëmtuar me manipulime.

“Vota e bashkatdhetarëve është një votë e pastër dhe prej shpirtit mirë”.

Të tjera