Lajme

Komandanti i FSK-së: Ushtarët e Kosovës mund të mbeten me trauma nga Shqipëria

Autori: Gazeta inFokus 23:21 | 28 November 2019

Komandanti i Forcës së Sigurisë të Kosovës, Rrahman Rama, në një emision në Klan Kosova ka folur për ushtarët e FSK-së të cilët gjenden duke intervenuar në Shqipëri pas tërmetit.

Ai ka bërë të ditur se në disa momente, ushtarët e FSK-së kanë rrezikuar më tepër që u lejohet për t’i ndihmuar viktimat e prekura nga tërmetet në Shqipëri, shkruan gazeta inFokus.

Rama tha se është krenar që është komandant i atyre djemve dhe vajzave për punën që kanë bërë në Shqipëri.

“Në momente të caktuara unë i shoh ushtarët që rrezikojnë më tepër që është e lejuar, por kjo është sakrificë individuale për të shpëtuar jetë.

Mirëpo janë disa procedura që ne duhet t’i respektojnë sepse është në të mirë të ushtarëve. Nuk është qëllimi që ne të humbim më shumë.

Ne kemi humbur diçka dhe ideja është që edhe ai që vepron të jetë i sigurt.

Bashkë me presidentin Thaçi kam qenë në vendngjarje, dhe nga ato që kam dëgjuar unë sinqerisht e kam ndjerë vetën shumë krenar dhe jam i privilegjuar që jam komandant i atyre djemve dhe vajzave për punën që kanë bërë.

Raportimet e para që kemi pasur në momentin që kemi shkuar në vendngjarje është se ka dëme të mëdha dhe se ka viktima që ndodhen nën gërmadha.

Pjesëtarët tonë kanë arritur që dy viktima t’i nxjerrin të gjallë. Një e kemi nxjerrë të gjallë dhe pastaj ai ka ndërruar jetë në spital.

Ne kemi kujdes të veçantë për ata njerëz dhe ata ushtarë që i kemi në njësi.

Unë kam thënë disa herë që dëshira ime më e vogël është që t’i aktivizoj njësitë e kërkim shpëtimit sepse duhet të kemi kujdes të veçantë – ata mund të kenë edhe trauma në të ardhmen për shkak të kufomave që i gjejnë në vendin e ngjarjes”, ka thënë Rama ./Gazeta inFokus/.

Të tjera