Sport

Franca mposhtë Belgjikën me përmbysje rezultati dhe kualifikohet në finale të Ligës së Kombeve

Autori: Gazeta inFokus 22:52 | 07 October 2021

Kombëtarja e Francës është kualifikuar në finale të Ligës së Kombeve, pasi në gjysmëfinale e ka eliminuar Belgjikën, duke e mposhtur me përmbysje rezultati nga 2-0 në 2-3, shkruan Gazeta inFokus.

Në takimin e zhvilluar në ‘Allianz Stadium’ në Torino, serinë e golave në këtë ndeshje të ‘çmendur’ e hapi sulmuesi i Athletico Madridit, Yannick Carrasco.

Futbollisti belg shënoi një gol fantastik në minutën e 37’ për rezultatin 1-0 në favor të ‘Dajave të Kuq’.

-Advertisement-

Gëzimi i kombëtares së udhëhequr nga Roberto Martinez u shtua tre minuta me vonë, pasi Romelu Lukaku e dyfishoi epërsinë 2-0, me një supergol të realizuar nga ‘këndi i vdekur’.

Pjesa e parë u mbyll me shifrat 2-0 në të mirë të Belgjikës, kurse në 45 minutat e dytë francezët bënë përmbysjen e madhe, duke realizuar tre gola për të kaluar në finalen madhe.

Sulmuesi në top formë i Real Madridit, Karim Benzema, shënoi në minutën e 62’ për ta ngushtuar rezultatin 2-1, kurse shtatë minuta me vonë Kylian Mbappe i barazoi shifrat 2-2, duke realizuar nga pika e bardhë në minutën e 69’.

Kur u mendua se ndeshja po shkonte në vazhdime në skenë doli mesfushori i Milanit, Theo Hernandez, i cili shënoi një eurogol në minutën 90+1’ për rezultatin përfundimtar 2-3 për ‘Gjelat’.

Pas këtij triumfi, Franca ka kaluar në finale të Ligës së Kombeve, aty ku do të takohet me Spanjën që mbrëmë eliminoi Italinë, duke e mposhtur me rezultat 2-1.

Finalja e Ligës së Kombeve mes Spanjës dhe Francës do të zhvillohet të dielën nga ora 20:45, kurse ndeshja për vendin e tretë mes Italisë dhe Belgjikës do të luhet po ashtu ditën e diel, por nga ora 15:00./Gazeta inFokus/

Subscribe në YouTube: GAZETA INFOKUSI
Fillon aplikimi për Global Engineer Girls Kosova

Të tjera