Një padi me rëndësi është fituar në Kosovë. Gjykata i ka dhënë të drejtë një personi me nevoja të veçanta, i cili ka paditur komunën e Prishtinës për mos ofrim të kushteve infrastrukturore për lëvizje të këtij grupi të shoqërisë.
I janë dashur 4 vjet që të marrë një përgjigje definitive nga Gjykata por Faruk Kukaj ka fituar një rast të rëndësishëm.

Ai ka paditur në 2018-n Komunën e Prishtinës për diskriminim ndaj personave me nevoja të veçanta, për shkak të mosofrimit të kushteve infrastrukturore për lëvizje.

Kukaj, po inkurajon që rrugën e tij ta ndjekin edhe të tjerët, e që sipas tij tashmë është dëshmuar që personat me nevoja të veçanta janë të diskriminuar.

“Është e drejtë e imja të kërkoj drejtësi dhe të jem mundësisht i barabartë në lëvizjen e lirë si qytetarët e tjerë. Ndërsa unë gjithmonë jam ndier i diskriminuar nga shoqëria dhe institucionet. Unë nuk kam pasur qasje me lëviz, vetëm zakonisht në rrugë ku lëvizin veturat se nëpër trotuare dhe objekte institucionale e kulturore, gati nuk ka asnjë qasje të plotë”, ka deklaruar Faruk Kukaj – Fitues i rastit.

Por, nga Komuna e Prishtinës, ndonëse nuk dëshirojnë të komentojnë rastin po thonë se kanë ndërmarrë hapa në ndryshimin e kësaj gjendje, rtv dukagjini.

“Kemi ndarë më së shumti ndoshta në histori të kryeqytetit, kemi ndarë rreth 300 mijë euro subvencione për këto organizata për t’i mbështetur personat me aftësi të kufizuara jo vetëm grupet e margjinalizuara”, ka thënë, Adelina Sahiti – Drejtoresh e Mirëqenies Sociale.

Ndërkohë, organizata “Handikos Kosova” ka kërkuar që të ndiqet shembulli i Kukajt, dhe kanë vazhduar kritika edhe për punën e gjykatave në këtë aspekt.

” Janë edhe 5 persona të tjerë që kanë bërë padi qysh në vitin 2018 por për shkaqe të zhegitjeve siç ndodhë tek ne, këto lëndë ende nuk janë shqyrtuar fare nga gjykatat. Siç është rasti në Mitrovicë, në Vushtrri, Prizren dhe një rast tjetër në Prishtinë. Ne presim që Gjykatat ti përshpejtojnë këto lëndë dhe inkurajojmë edhe personat e tjerë që të kërkojnë të drejtën e tyre duke u bazuar në legjislacionin aktual”, ka theksuar Afrim Maliqi – Drejtor i Handikos Kosova

Faruk Kukaj është personi i parë që ka fituar padi të këtij lloji në Kosovë, duke e cilësuar vendimin e tij si të guximshëm dhe të drejtë.

BKT Kosova synon të rrisë ndërgjegjësimin lidhur me çrregullimet e spektrit të autizmit në Ditën Botërore të Ndërgjegjësimit për Autizmin

Sponsoruar