Lajme

Fatmir Sejdiu, i gatshëm të jetë pjesë e Ekipit të Unitetit (Video)

Autori: Gazeta inFokus 21:31 | 12 September 2017

Ish-presidenti i Kosovës, Fatmir Sejdiu, ka thënë se e ka kundërshtuar dialogun e Kosovës me Serbinë në formatin “që nuk ka definim të qëllimit”.

Në emisionin “Politikë” në Tribuna Channel, ai ka shtuar se pala serbe ka dashur që ta keqpërdor dialogun për qëllimet e saja.

Sejdiu shprehet se ka kërkuar nga të gjithë pasardhësit e tij, që të kërkojnë ndihmë nga ai në këtë proces, por edhe në proceset e tjera, porse asnjëherë nuk e kanë konsultuar. Ndërsa, thotë se do të jetë i gatshëm të jetë pjesë e Ekipit të Unitetit të propozuar nga presidenti Hashim Thaçi.

-Advertisement-

Ai ka thënë se çështja e Demarkacionit me Malin e Zi është jashtëzakonisht e ndjeshme, si për shtetin të Kosovës, po ashtu edhe për marrëdhëniet e shtetit me fqinjët e tij. Ndaj, ka kërkuar nga instancat më të larta të vendit, që të kenë kujdes në zgjidhjen e kësaj çështjeje.

Ish-presidenti i Kosovës ka kërkuar që institucionet e vendit të punojnë në ndërrimin e Kushtetutës së saj, sidomos në pjesën ku presidenti i vendit zgjidhet në Parlament. Ai ka thënë se Kosovës i duhet një Kushtetutë ku presidenti zgjidhet në mënyrë të drejtpërdrejt nga vota e qytetarëve të vendit. Por, ka shtuar se kjo gjë nuk duhet të jetë një ndër prioritetet kyçe të vendit, pasi që Kosova është në zor të temave të mëdha, si: Demarkacioni, Asociacioni, luftimi i korrupsionit dhe krimit të organizuar.

Sejdiu në këtë emision ka folur për ecurinë e formimit të institucioneve të reja, me theks të veçantë formimin e Qeverisë Haradinaj. /Tribuna Channel/