Fahrije Hoti, udhëheqëse e Kooperativës Krusha, në një konferencë për media ka folur pas reagimeve të shumta se ajo u refuzua nga Ministria e Bujqësisë në krye me Faton Pecin për grantin që kishte aplikuar.

Hoti ka thënë se me keqardhje duhet të pranojë se asnjëherë më parë si këtë vit nuk janë etiketuar gratë e Krushës.

Ajo ka lutur institucionet të mos merren me Gratë e Krushës, derisa ka thënë se këtë dhimbje nuk po e përjeton për emrin e saj, shkruan Gazeta Infokus.

“Në 2010en kemi punu nëpër familje, nga 2010-ta na kanë ndihmuar qoftë ministritë qoftë donatorët e ndryshëm, jemi bërë bashkë kemi rrugëtu pa u dorëzu. Kemi pasur prodhim asnjëherë pa kërkuar ndihmë nga askush. Por vetë ato vetë ministrat e kanë parë rezistencën tonë që kemi dhe na kanë afru dhe na kanë ndihmu në mënyra të ndryshme. Por asnjëherë etiketim ndaj grave të Krushës nuk ka ndodhur deri në këtë vit. Unë me keqardhje po e them prapë. Nuk po me dhemb si e kam emrin Fahrije Hoti, po më dhemb se janë gratë e Krushës. Unë kisha kërku prapë nga ministri dhe nga institucionet që mos të merren me çështjen e Fahrijes, unë e kam marrë një vendim që më është refuzuar projekti qe dy muaj. Kemi bërë ankesë na kanë refuzuar ankesën qe dy muaj. Nuk jemi marrë me atë çështje nuk e di, Lirim Mehmetaj ku i ka marrë dokumentet që i ka shpalos që kam refuzim”, ka thënë ajo.

Gruaja e hekurt e Krushës ka thënë se gratë e këtij fshati dhe fabrika e saj nuk kanë nevojë për lëmoshë dhe se paguajnë taksa si çdo ndërmarrje tjetër.

“Nuk jam kundër asnjë përfituesi, pse janë lajthit emrat e dy femrave gjatë kohës nëpër rrjete sociale dhe media. Le të lajthiten emrat e burrave a psë janë më të fuqishëm fizikisht e femrat jemi më të buta apo për cfarë arsye, asgjë personale nuk kam. Është fabrikë që punojnë mbi 50 punëtorë, kontribuojmë në shtet jemi taksapagues si krejt ndërmarrjet tjera. Nuk jemi për lëmoshë, lëmosha ka kalu”, ka thënë Hoti.

Ky reagim i saj vie pasi ministri Peci u akuzua se nuk ndau grant për Kooperativën Krusha, pavarësisht që kishin aplikuar.

Ministri i Bujqësisë pas reagimeve të shumta të opozitës që e akuzonin se kishte ndarë grant për vëllain dhe dajën e deputetes të VV-së, Fitore Pacolli e kishte refuzuar Fahrijen, publikoi një dokument duke thënë se në vitin 2017, ajo edhe ishte paditur nga Ministria për kthim të grantit prej 17 mijë eurosh në kohën kur ministër ishte Memli Krasniqi.

Mirëpo ministri edhe për këtë u demantua nga Fahrije Hoti./Gazeta Infokus

Fahrije Hoti e demanton Faton Pecin që tha se ajo ishte paditur nga Memli Krasniqi sa ishte ministër i Bujqësisë

Përsëri në shkollë me Viva Fresh Store!  

Sponsoruar