Për shkak të rritjes së çmimeve të produkteve esenciale, të naftës dhe të energjisë elektrike në Kosovë, ditë më parë u propozua sërish mundësia e tërheqjes së 20% nga Trusti Pensional, shkruan Gazeta Infokus.

Por, një mundësi të tillë ekonomistët nuk po e shohin si të dobishme për qytetarët e Kosovës.

Njohësi i çështjeve ekonomike, Safet Gerxhaliu, për Gazetën Infokus tha se në këtë kohë kur qytetarët e Kosovës janë duke u ballafaquar më një krizë sociale shteti duhet t’u ndihmojë qytetarëve dhe të mos i shfrytëzojnë të vetmin garancion që e kanë për pleqëri.

“Është me të vërtetë një kohë mjaft kritike dhe besoj që për qytetarin duhet të ketë siguri dhe siguri e vetme e qytetarit është ai Trust Pensional që i ka për ardhmëri. Përndryshe është koha ku vërtetë qytetari duhet ta shijojë dorën e zgjatur të shtetit, shteti duhet t’i ndihmojë familjet siç e bën Franca, Italia, Shqipëria dhe jo gjithmonë do të thotë që Trusti Pensional të jetë një alternativë”, ka thënë Gërxhaliu.

Gjithashtu, ish-kryetari i Odës Ekonomike e sheh si mëkat për Kosovën tërheqjen e sigurisë së qytetarëve dhe stimulimin e prodhuesve të vendeve të rajonit e Evropës.

“Në kohë kur e kemi këtë inflacion, të tërhiqet siguria e qytetarëve dhe të stimulohet prodhuesi i vendeve të rajonit dhe Evropës është mëkati më i madh që i bëhet Kosovës dhe dëmi më i madh që i bëhet qytetarit të Kosovës”, ka deklaruar ai.

Gërxhaliu, po ashtu tha se ka marrë kritika edhe herën e kaluar kur kishte dalë kundër tërheqjes së 10% të mjeteve nga Trusti.

Si zgjidhje ai e sheh krijimin e një fondi emergjent në mënyrë që të ndihmohen qytetarët e Kosovës në këtë kohë krize.

“Besoj që Kosova duhet ta kuptojë, apo Qeveria e Kosovës që jemi në një situatë alarmante, jemi në një situatë emergjente dhe të krijohet një fond emergjent për t’i ndihmuar qytetarët në Kosovë”, është prononcuar Gërxhaliu për Infokusin.

E këtë tërheqje të mjeteve edhe gazetari i ekonomisë, Zekirja Shabani, po e sheh të dëmshme.

Ai tha se një propozim i tillë është i pamenduar mirë dhe se politikanët po e keqpërdorin duke u paraqitur si shpëtimtarë me mjete të qytetarëve.

“Ky është një propozim i pa menduar dhe i dëmshëm për qytetarët të cilët çdo muaj kursejnë nga paga e tyre për kohën e pensionimit, kur nuk do të jenë në gjendje të punojnë. Kjo po keqpërdoret nga politikanët duke shfrytëzuar gjendjen e rëndë sociale për t’u paraqitur si shpëtimtarë me para të qytetarëve”, ka thënë Shabani.

Gjithashtu, ai tha se ky propozim nuk do të ndikojë pozitivisht tek qytetarët.

“Sado që mund të duket si mundësi për qytetarët që ta tejkalojnë gjendjen e rëndë socio-ekonomike në të cilën po kalojnë, kjo do të rrezikoj pensionet e qytetarëve, sidomos ata të cilët janë në prag të pensionimit”, ka deklaruar gazetari Shabani.

Kurse, si zgjidhje ai e sheh vënien në funksion të rreth 4 miliard euro depozita të qytetarëve të cilat ruhen në banka komerciale dhe përkrahjen e bizneseve.

“Në vend të parave të trustit, institucionet duhet të shohin mundësi për vënien në funksion të rreth 4 miliard euro depozita të qytetarëve të cilat ruhen në banka komerciale si dhe të përkrahin bizneset që të rrisin punësimin dhe pagat në mënyrë që qytetarët të kenë më shumë të ardhura në dispozicion për konsum. Duke rritur konsumin rriten të ardhurat në mënyrë zinxhirë si për biznesin ashtu edhe për shtetin”, ka shtuar Shabani.

Edhe qytetarëve të Prishtinës nuk po iu pëlqen një propozim i tillë.

Në disa përgjigje për Gazetën Infokus, pjesa më e madhe e tyre ishin kundër tërheqjes, për arsye të ndryshme.

Një ndër arsyet më të shpeshta ishte se duhet të mendohet për pleqërinë.

Madje, njëri nga qytetarët tha se kjo gjë nuk i intereson fare.

“Nuk po di aty e vendos vetë qeveria, unë e kom rras trustin s’kam lan kurgjo ma aty, nuk më intereson”, deklaroi një qytetar tjetër.

Tërheqja e një përqindje nga Trusti Pensional ishte lejuar edhe para një viti.

Kjo tërheqje ishte vetëm 10 % e që u vendos për të përkrahur familjet me nevojë për shkak të pandemisë me Covid-19, që kishte kapluar tërë botë./Gazeta Infokus/

BKT Kosova vazhdon përkushtimin ndaj gjithëpërfshirjes duke dhuruar një furgon për të mbështetur fëmijët me nevoja të veçanta

Sponsoruar