Lajme

Edukimit, t’i jepet prioritet nga fondet e IPA-s

Autori: Gazeta inFokus 13:18 | 16 October 2017

Marrëveshja financiare e IPA-së mes Kosovës dhe Bashkimit Evropian, që kap shumën mbi 71 milionë euro, do të sjellë përfitime për të gjithë qytetarët e Kosovës pa dallim. Projektet e parapara të financohen me këtë marrëveshje do të fillojnë të zbatohen nga viti i ardhshëm deri me 2020. Investimi në edukim, sipas njohësve të integrimit evropian, është formula kryesore për zhvillim ekonomik.

Institucionet e Kosovës së bashku me ato të Bashkimit Evropian i kanë përcaktuar projektet që do të përfitojnë nga marrëveshja financiare e IPA-së.

Drejtori i departamentit të asistencës zhvillimore në Ministrinë e Integrimit Evropian, Florim Canolli, në një deklaratë për Radio Kosovën, përmendi fushat që do të përfitojnë nga IPA.

-Advertisement-

“Demokracia dhe qeverisja, sundimi i ligjit dhe të drejtat fundamentale, konkurrueshmëria dhe inovacioni, si dhe arsimi, punësimi dhe politikat sociale, të gjitha këto projekte përfshijnë institucionet përfituese, janë institucione qeveritare dhe përfituesit finalë janë qytetarët e Kosovës”, tha Canolli.

E zbatimi i projekteve të programit IPA 2016 do të bëhet pas hyrjes në fuqi të marrëveshjes financiare, e cila sipas Canollit, pritet që të bëhet deri në fund të këtij viti.

“Procesi i tenderimit ka filluar dhe do të vazhdojë edhe gjatë vitit të ardhshëm, mandej do të jetë kontraktimi, mund të ketë vonesa të ndryshme në këtë proces, por, sipas të gjitha afateve të parashikueshme, do të fillojnë gjatë vitit të ardhshëm, ndërsa disa të tjera në vitin 2019, e disa të tjera edhe në 2020”, deklaroi ai, raporton Radio Kosova.

Kurse Emrush Ujkani, njohës i Integrimit Evropian, foli për një vëmendje më të shtuar të institucioneve të Kosovës se ku duhet të shkojnë mjetet nga marrëveshja IPA. Ai veçon sektorin e edukimit si ndikues në zhvillim ekonomik.

“BE dhe institucionet tona e kanë kuptuar se nëse flasim për zhvillim ekonomik”, tha ai.

Ndryshe institucioni që kryen menaxhimin e programeve të IPA-s në Kosovë, është Zyra Ndërlidhëse e Komisionit Evropian.

Subscribe në YouTube: GAZETA INFOKUSI