Lajme

Edhe Erden Atiq është ngujuar në komunën e Mitrovicës së Veriut

Autori: Gazeta inFokus 20:27 | 08 June 2023

Kryetari i Leposaviqit, Lulzim Hetemi, nuk është i vetmi lider lokal në veri që po qëndron i mbyllur brenda objektit të komunës atje, tash e 11 ditë.

As kryetari i Mitrovicës së Veriut, Erden Atiq, nuk po e lëshon perimetrin e objektit komunal, derisa po e kalon edhe natën brenda zyrave të kësaj ndërtese.

Klan Kosova e ka konfirmuar nga disa burime këtë informacion, teksa ngujimi i Atiqit në komunë nuk është bërë publik gjatë kësaj periudhe nga qeveria apo Lëvizja Vetëvendosje. Nga njëra dhe tjetra i thanë Klanit që për këtë çështje të flitet me vetë kryetarin, i cili nuk pranoi të flasë, kur u pa për pak sekonda në oborr.

-Advertisement-

As policia s’ka kthyer përgjigje nëse karantinimi i Atiqit është masë sigurie apo veprim vullnetar i tij. Atij, megjithatë, i ofrohet mbrojtje 24 orëshe nga forcat e rendit, njofton Klan Kosova.

Hapësira rreth objektit komunal në Lagjen e Boshnjakëve është kryesisht e qetë dhe pa protesta, ndryshe nga ajo që po ngjan në tri qytetet tjera veriore.

Kryetari i Leposaviqit, Lulzim Hetemi gjendet në tjetër situatë, pasi rreth vendit të tij të punës, ka forca të shtuara të KFOR-it, por edhe protesta të përditshme të serbëve, të cilët po kërkojnë që ai lirojë ndërtesën.

Ani se i ngujuar për shumë ditë, i njëjti kishte deklaruar për media që është mirë dhe se po ushqehet si në hotel.

Veprimin e tij e kishte lëvduar kryeministri Albin Kurti, i cili ia dha epitetin e qëndresës shembullore izolimit të Hetemit.

Sidoqoftë, ky edhe mund të jetë mërzitur paksa, për shkak të mungesës së komunikimit fizik me tjerët, gjë që nuk është rast edhe me Atiqin.

Kryetarit të Mitrovicës së Veriut i vijnë në zyrë, shpesh, mysafirë të ndryshëm, përfshirë kolegë nga partia dhe institucionet e shtetit.