Ish-zëvendësministri i Drejtësisë, Florian Dushi ka kujtuar vrasjen e Bajram Kelmendit dhe dy djemve të tij, në përvjetorin e 19-të.

Ai ka thënë se mosndriçimi i vrasjes së trefishtë tregon vazhdimësinë e qasjes kriminale të secilës qeveri serbe për atë që kishte ndodhur në Kosovë dhe më pas.

Dushi është shprehur se institucionet e Kosovës dhe ato ndërkombëtare duhet të ushtrojnë presion në Beograd që ata të gjejnë dhe të ndëshkojnë vrasësit e familjes Kelmendi.

Më poshtë gjeni komentin e tij të plotë:

Vrasja e Avokatit të Kosovës

Nëntëmbëdhjetë vite nga vrasja e Avokatit Bajram Kelmendi dhe dy bijve të tij, Kastriotit dhe Kushtrimit.

Ishte ndër vrasjet më të tmerrshme që ishin kryer në Prishtinë, në natën që sapo kishin filluar bombardimet e NATO-s kundër Serbisë dhe forcave të saj në Kosovë, e cila padyshim ishte vrasje e porositur nga strukturat më të larta të regjimit kriminal të Beogradit dhe ishte ekzekutuar nga skuadrat vrasëse të strukturave të sigurisë dhe mbrojtjes së këtij regjimi që po kryenin krime të përmasave gjenocidale në Kosovë.

Vrasja e Avokatit Bajram Kelmendi dhe e bijve të tij, Kastriotit dhe Kushtrimit, edhe pas kaq viteve, konsiderohet si vrasja e vetme politike e kryer gjatë luftës e që, pavarësisht se dihet saktë se ishte instruktuar nga regjimi kriminal i Beogradit, mbetet ndër vrasjet e vetme për të cilat mungon edhe informacioni publik më i vogël sa i përket ekzekutorëve të këtij projekti që kishte për qëllim ndëshkimin e një familjeje të tërë për veprimtarinë e tyre në mbrojtje të të drejtave dhe lirive të shqiptarëve të Kosovës të cilëve, sidomos gjatë viteve të nëntëdhjeta, të drejtat dhe liritë themelore iu ishin mohuar pothuajse në tërësi.

Mosndriçimi i vrasjes së trefishtë në familjen Kelmendi, edhe sot e kësaj dite, tregon saktë për vazhdimësinë e qasjes kriminale të secilës qeveri serbe në raport me atë çfarë kishte ndodhur në Kosovë, por edhe më pas. Mosndriçimi i këtij rasti, por edhe rasteve të tjera, është treguesi më i pakontestueshëm se, qeveritë në Beograd edhe mund të ndryshojnë, por jo edhe qasja e tyre armiqësore ndaj shqiptarëve.

Institucionet tona shtetërore e institucionet ndërkombëtare sidomos, duhet të ushtrojnë presion mbi qeverinë e Beogradit, sot dhe nesër, me qëllim që ajo të gjejë e të ndëshkojë vrasësit e Avokatit të Kosovës, Bajram Kelmendi dhe dy bijve të tij. Qeveria e Beogradit sot, ka informacione të sakta mbi urdhërdhënësit dhe ekzekutorët e këtij akti makabër, nisur nga fakti se, presidenti i sotëm Vuçiq, por edhe zyrtarë të tjerë të lartë qeveritarë sot në Serbi, gjatë kohës së luftës, mbanin pozita kyçe në qeverinë e Millosheviçit. Prandaj, të njëjtit nuk mund të shtiren as të painformuar e as jo përgjegjës për krimet e kryera në Kosovë. Ndryshe, nëse vazhdohet me këtë qasje, paqja kaq shumë e synuar në mes të popujve tonë, do të jetë diçka e paarritshme.
…
Bajram Kelmendi, ishte bashkëthemelues dhe një kohë Kryetar i Këshillit për Mbrojtjen e të Drejtave dhe Lirive të Njeriut në Prishtinë (KMDLNJ); ishte ndër nismëtarët e Lëvizjes gjithëpopullore për pajtimin e gjaqeve. Ishte i pari shqiptar që e denoncoi me shkrim dhe hapur për krime lufte Sllobodan Millosheviçin në organet gjyqësore të atëhershme, duke punuar ditë e natë në ushtrimin e denoncimeve dhe kompletimin e materialit argumentues kundër tij në Tribunalin e Hagës, të cilin e vizitoi personalisht tri herë dhe i dorëzoi ato materiale të cilat dëshmonin qartë krimet e kryera ndaj shqiptarëve nga regjimi i Millosheviçit.
Bashkë me akademik Gazmend Zajmin kishte inicuar procedurën për vlerësimin e kushtetutshmërisë së vendimit të Kuvendit të Kosovës për dhënien e pëlqimit (të dhunshëm) për ndryshimet në Kushtetutën e Serbisë, me të cilat ndryshime Kosovës iu hoq autonomia, të cilën e kishte fituar me Kushtetutën e vitit 1974.
Bajram Kelmendi ishte edhe anëtar i Grupit Negociator i njohur me shkurtesën “G-15”, për zgjidhjen paqësore të çështjes së Kosovës, grup i cili ishte formuar nga Presidenti i Republikës së Kosovës, Dr.Ibrahim Rugova etj.

Blerando i Big Brother Vip Kosova – fytyra e re e Prince Espresso

Sponsoruar