Ministri i Punëve të Jashtme, Enver Hoxhaj thuhet se nuk i lë të heqin keq të afërmit e tij në misione diplomatike. Gazeta Fjala ka siguruar dëshmi se konsullit të Kosovës në Milano të Italisë, Lavdim Morinës, përveç pagës i paguhen edhe shpenzimet e nevojave të luksit, si shampo për flokë, sapunë, e kremëra për trup.

Morina sipas dëshmisë së një burimi të Gazetës është dhëndër i ministrit Enver Hoxhaj.

Ndërkaq, fatura e blerjeve në dyqanin “Risparmio Casa”, në Milano për nevoja personale, në vlerë prej 67.81 euro, mbanë vulën e Republikës së Kosovës, si dëshmi për aprovim të shpenzimeve.

Gazeta Fjala posedon dokumentin ku shihet se pagesa është bërë me 8 dhjetor të vitit të kaluar me kartelë në ora 17:24.

Bazuar në të dhënat e siguruara dyshohet se kjo pagesë është bërë nga Morina edhe pse një gjë e tillë nuk parashihet me asnjë akt ligjor apo nënligjor.

Por, duket se kjo nuk është diçka e re për diplomacinë kosovare.

“Sipas hulumtimeve atyre përpos pagave dhe beneficioneve të larta si shpenzimet e banesave, biletat e fluturimeve për pushime, sigurimet shëndetësore, mobilimet e banesave, shpenzimet e telefonave etj., u mbulohen edhe shpenzimet e nevojave dhe luksit ditor, si shampona flokësh, zbutës për larje rrobash, detergjent, body lotion, sapunë të ndryshëm etj”, i ka thënë Gazetës Fjala ky burim, duke treguar për privilegjet që gëzojnë të afërmit e ministrit Hoxhaj.

Ndryshe thotë se diplomatëve jo të afërm me kabinetin e të parit të MPJ-së nuk i aprovohen as shpenzimet e domosdoshme të parapara me ligj.

“Pavarësisht faktit se termi diplomat në një botë normale nënkupton ajkën e ajkës së një shoqërie, në Kosovë kjo çështje ka devalvuar deri në atë nivel, saqë diplomacinë tonë sot e përbëjnë të paaftit për të gjetur punë, abuzuesit me detyrën zyrtare dhe të dështuarit, mjafton të jesh familjar apo i afërt me ministrin Hoxhaj dhe kabinetin e tij”, thotë ky burim.

Gazeta Fjala, ka kërkuar që nga java e kaluar sqarime nga Ministria e Punëve të Jashtme lidhur me lidhjen familjare të ministrit Hoxhaj me konsullin e Kosovës në Milano të Italisë, Lavdim Morina, por nuk ka marrë ende përgjigje.

Ky nuk është skandali i vetëm i MPJ-së

Kjo ministri është përballur edhe në të kaluarën me skandale të cilat u cilësuan si “zbehje të imazhit të përfaqësuesve diplomatikë të Republikës së Kosovës”.

Në vitin 2013, Urtak Hamiti, ishte shkarkuar nga posti i diplomatit në Kroaci pas skandalit diplomatik, i cili në gjendje të dehur është gjetur se kishte dëmtuar pronën e qytetarëve kroatë dhe veturën.

Enver Hoxhaj, që mbante postin e ministrit të Punëve të Jashtme edhe më 2013, kishte marrë vendimin për suspendimin e tij. Vendimi e obligonte Hamitin që të kthehej në Kosovë dhe të punonte në një post më të ulët në Ministrinë e Punëve të Jashtme.

Po ashtu, vendimi i Hoxhajt i pamundësonte Urtak Hamitit që brenda dy vjetësh të angazhohej në poste diplomatike.

Hamiti, djali i nënkryetarit të LDK-së Sabri Hamitit ishte punësuar në ambasadën e Kosovës në Kroaci, në vitin 2010. Atë kohë, ministër i Punëve të Jashtme ishte Skënder Hyseni i Lidhjes Demokratike të Kosovës./Gazeta Fjala/

Thyhet REKORDI I ZBRITJEVE!

Sponsoruar