Lajme

Dështimi i ministrave dhe deputetëve në komuna

Autori: Gazeta inFokus 08:09 | 25 October 2017

Dy ministra të Qeverisë së Kosovës në zgjedhjet lokale të 22 tetorit nuk arritën bashkërisht t’i marrin më shumë se 1000 vota. Betejën komunale në rundin e parë e humbën edhe gjashtë deputetë të Kuvendit të Kosovës, shkruan sot, gazeta Zeri.

Ndonëse u zgjodhën deputetë e u emëruan ministra shumë prej tyre brenda pak muajve ia mësynë garës edhe për zgjedhjet lokale të 22 tetorit, duke pretenduar kështu që ta marrin udhëheqjen e komunave përkatëse.

Por, pavarësisht kësaj, pjesa dërrmuese e tyre dështuan qysh në start në këtë mision. Dy ministrat e Nismës për Kosovën, Shyqyri Bytyçi (ministër i Arsimit) dhe Bajram Hasani (i Tregtisë e Industrisë), pretenduan të vinin në krye të Prishtinës e Gjilanit, por nuk arritën ta kalojnë as rundin e parë të zgjedhjeve.

-Advertisement-

Ministri Hasani në Gjilan i mori vetëm 665 vota, përderisa Bytyqi në Prishtinë edhe më pak, përkatësisht 568 vota. Përfaqësues nga Nisma lidhur me dështimet e ministrave të tyre në nivel lokal thonë se synimi i partisë nuk ishte që të shkohet në balotazh, porse të fitohet sa më shumë nëpër asambletë përkatëse.

E përderisa deputetët si Qëndron Kastrati, Arban Abrashi, Mytaher Haskuka, Sami Kurteshi, Gani Dreshaj, Mimoza Kusari-Lila e Agim Aliu shkuan në balotazh, një pjesë e konsiderueshme e tyre nuk arritën ta bënin një hap të tillë.

Zafir Berisha, Faton Topalli, Driton Çaushi, Sali Salihu, Zenun Pajaziti e Emilia Rexhepi ndonëse ishin shprehur të bindur në fitore nuk e arritën një gjë të tillë. Pavarësisht humbjes disa prej tyre thonë se nuk kishin ambicie për fitore, por vetëm për ta rritur partinë në komunat përkatëse.

Subscribe në YouTube: GAZETA INFOKUSI
Etiketa:
UNI-Universum International College rankohet me sukses në Times Higher Education Impact Rankings 2024
-Advertisement-

Të tjera

Fokusi

lajme