Sport

Cancelo: Napoli më ka pëlqyer gjithmonë, nesër jemi në pozita të barabarta!

Autori: Gazeta inFokus 13:57 | 11 Mars 2024

Me ndeshjen e parë të raundit të 1/8-ave të Champions League ndaj Napoli-t që përfundoi me barazimin 1-1, Barcelona do të luajë gjithçka këtë të martë në “Camp Nou” për t’u rikthyer në raundin e çerekfinaleve, me katalanasit që mungojnë në këtë fazë që nga edicioni 2019-2020.

Duke folur për mediet në prag të këtij takimi, mbrojtësi i Barçës, Joao Cancelo u shpreh te Napoli kanë kaluar një vit të vështirë, por shton se edhe atje presioni për të fituar është njësoj si te skuadra e tyre.

“Futbolli është një sport i çuditshëm. Viti i tyre është gjithashtu një vit i vështirë. Ata fituan titullin duke luajtur në mënyrë spektakolare, më pas ndryshojnë trajnerë dhe përfundojnë në një situatë aspak të mirë. Te Napoli presioni për të fituar është i njëjtë me tonin në Barcelonë”-tha fillimisht ai.

-Advertisement-

Më tej, mbrojtësi shtoi se Napoli është një skuadër që i ka pëlqyer gjithmonë, ndërsa shtoi se aktualisht janë në pozita të barabarta.

“Napoli më ka pëlqyer gjithmonë shumë, për Maradonën dhe sepse është një ekip popullor dhe me rrënjë të thella në qytet. Në ndeshjen e pare nuk bëmë maksimumin tonë, patëm një pjesë të parë të shkëlqyer dhe duhet të kishim shënuar më shumë. Ne ishim superiorë, ata bënë pak, por tani fillojmë në pozitë të barabartë”-deklaroi Cancelo.