Presidenti i Shteteve të Bashkuara të Amerikës, Joe Biden, publikoi të enjten një strategji të shumëpritur për të luftuar urrejtjen kundër myslimanëve dhe arabëve, e cila është rritur ndjeshëm që nga fillimi i luftës Izrael-Gaza.

Strategjia kërkon veprime urgjente dhe të vazhdueshme për të reduktuar diskriminimin dhe paragjykimet.

Dokumenti prej 64 faqesh, njofton Reuters, përmban mbi 100 masa nga degët ekzekutive, dhe publikohet disa javë para inaugurimit të ish-presidentit Donald Trump, i cili gjatë mandatit të tij të parë vendosi një ndalim udhëtimi për disa vende me shumicë myslimane, një masë që Biden e anuloi në ditën e parë të detyrës, transmeton Klankosova.tv.

Strategjia pasqyron një plan të ngjashëm për luftimin e antisemitizmit, të publikuar nga Shtëpia e Bardhë në shtator 2023, dhe vjen më shumë se një vit pas vrasjes së Wadea Al-Fayoume, një djalë gjashtëvjeçar palestinezo-amerikan, i cili u vra me thikë nga një burrë që sulmoi atë dhe nënën e tij për shkak të përkatësisë së tyre etnike.

Në parathënien e strategjisë, Biden i quajti sulmet ndaj djalit dhe nënës së tij si “akte të neveritshme” dhe theksoi rritjen e krimeve të urrejtjes, diskriminimit dhe ngacmimeve kundër myslimanëve dhe arabëve.

Ai e cilësoi këtë si një fenomen të gabuar dhe të papranueshëm.

“Myslimanët dhe arabët meritojnë të jetojnë me dinjitet dhe të gëzojnë çdo të drejtë në mënyrë të plotë, ashtu si të gjithë bashkëqytetarët e tyre amerikanë”,  shkroi Biden. “Politikat që rezultojnë në diskriminim ndaj tërë komuniteteve janë të gabuara dhe nuk na bëjnë më të sigurt”.

Jim Zogby, themelues i Institutit Arab Amerikan, mirëpriti zgjerimin e fokusit të strategjisë për të përfshirë urrejtjen kundër arabëve, përveç asaj kundër myslimanëve, por parashikoi se administrata e ardhshme e Trumpit do ta injorojë atë.

Ndërkohë, ekipi i tranzicionit i Trumpit nuk dha komente të menjëhershme mbi strategjinë apo mbështetjen e saj.

Trump ka fituar mbështetje nga disa votues myslimanë të zhgënjyer nga përkrahja e Biden për luftën e Izraelit në Gaza dhe ka deklaruar se do të ndalojë hyrjen në SHBA të kujtdo që vë në pikëpyetje të drejtën e Izraelit për të ekzistuar.

Ai gjithashtu ka premtuar të revokojë vizat e studentëve të huaj që shfaqin qëndrime “antisemite”.

Pas sulmeve të Hamasit më 7 tetor në Izrael, tensionet midis grupeve pro-Izrael dhe pro-Palestinë janë rritur ndjeshëm në disa universitete amerikane, duke shkaktuar shqetësime për rritjen e antisemitizmit, islamofobisë dhe urrejtjes kundër arabëve.

Hej, hej, hej, erdhi Black Friday me zbritje deri në 75% në Comodita Home

Sponsoruar