Deputetja e LDK’së, Hykmete Bajrami, ka thënë se dje ministri Hekuran Murati ka bërë propagandë në Gjakovë kur ka thënë se rritja ekonomike në të kaluarën ka ardhur nga borxhet e marra nga shteti.

“Dje, Hekuran Murati paska mbajtë një ligjëratë propaganduese në Gjakovë. Ai u mundua t’i bindë gjakovarët se rritja ekonomike në të kaluarën ka ardhur nga borxhet e marra nga shteti – sipas tij 1.5 miliardë euro. Madje po krenohet se qeveria e tij nuk po bën të njëjtën gjë.”

Bajrami thotë se e vërteta qëndron ndryshe. Ajo ka thënë që Qeveria ka vazhduar të marrë borxhe “nuk kanë marrë vetëm kur s’kanë mundur t’i ketë 80 vota në Kuvend”.

Bajrami shton se Qeveria nuk ka ndërtuar asgjë me paratë e marra borxh “sepse nuk ka pasur investime kapitale”.

“Qeveria nuk ka ndërtuar asgjë me paratë e marra borxh, sepse nuk ka pasur investime kapitale; as autostrada, as spitale, as shkolla, asgjë. Pra në vend se Qeveria të marrin borxhe për zhvillim, falë rritjes enorme të çmimeve kanë marrë më shumë para nga qytetarët, duke i varfëruar ata.”

Kandidatja për deputete nga LDK ka thënë se politikat e qeverisë i kanë futur qytetarët në borxh. Ajo ka përmendur kreditë që qytetarët kanë marrë gjatë vitin që lamë pas.

“Politikat e qeverisë kanë futur qytetarët në borxh. Sipas Bankës Qendrore të Kosovës, kreditë në banka në fund të dhjetorit 2024 kanë arritur shumën pre 5.668 miliardë euro. Vetëm në vitin 2024 janë shtuar 768 milionë euro kredi të reja.”

Ajo ka thënë se në të kaluarën shteti merrte borxh dhe ndërtonte infrastrukturë ndërsa sot qytetarët po marrin borxh për të mbijetuar.

Bajrami në fund ka thënë se qeveria po përpiqet të mashtrojë më numra por se qytetarët e kanë të vërtetën që e kanë jetuar, duke shtuar se “ndryshimi është afër”.

“Pra, në të kaluarën shteti merrte borxh dhe ndërtonte infrastrukturë për qytetarët. Sot, qytetarët janë ata që po marrin borxh për të mbijetuar, derisa qeveria merr me shumë tatime e taksa falë çmimeve të rrituara. Në katër vitet e fundit infacioni ka qënë 21.5%. Siç e ka thënë Ronald Reagan: “Nuk kemi inflacion sepse njerëzit po jetojnë shumë mirë, kemi inflacion sepse qeveria po jeton shumë mirë.” Qeveria ka bërë përpjekje të mashtroj me numra katër vite radhazi, por qytetarët e kanë të vërtetën e tyre, ata që e kanë jetuar atë. 9 shkurti është afër. Ndryshimi është afër”, ka shkruar Bajrami.

Black Friday ne Artmotion

Sponsoruar