Ministri i Shëndetësisë, Arben Vitia, ka folur për sfidat e shumta që po ballafaqohet shëndetësia kosovare.

Ai tha se shëndetësia është një sektor kompleks, derisa theksoi se procesi i reformimit është tejet i rëndësishëm dhe i pa kthyeshëm.Vitia më tej deklaroi se përgjatë viteve të shkuara intervenime të pjesshme nuk kanë rezultuar produktive, nuk kanë dhënë efektin e duhur.

“Prandaj jemi të përcaktuar për një reformë të pakthyeshme për të vendosur standarde të një reforme të pakthyeshme bazuar në analizë, në evidencë, që ky proces të jetë i pakthyeshëm”, deklaroi ministri Vitia në RTK.

Ai tutje ka folur për migrimin e mjekëve, ku sipas tij, është një trend edhe në vendet tjera jo vetëm në rajon, por edhe në Evropë, derisa shtoi se deri në miratimin e Ligjit për paga, ikja e mjekëve ka qenë e kuptueshme.

“Me Ligjin e pagave, profesionistët shëndetësorë janë ata që përfituan më së shumti, një mjek specialist, bazuar jo vetëm në rrogën bazë, por me shtesa e kujdestari, rrallë ndonjë mjek specialist, sidomos në institucionet sekondare e terciare ka rrogën nën 2000 euro”, deklaroi Vitia.

Ai tha se kjo është një nga iniciativat kryesore që do të parandalohet migrimi i mjekëve.

Vitia më tej foli për ndërtimin e sistemit shëndetësor, sipas tij, në disa dimensione ku e para është sigurimi shëndetësor i detyrueshëm për të gjithë qytetarët e vendit, i paraprirë nga sistemi informativ shëndetësor, si dhe në masat parandaluese të shëndetit publik. Ai premtoi se në gjysmën e parë të vitit 2024 do të jetësohet sistemi informativ shëndetësor, prej nga do të pasohet me fondin për sigurime shëndetësore.

Vitia foli për çmimin tavan të barnave, që, sipas tij, prekin direkt xhepin e qytetarëve, ku gjithashtu premtoi se Ligji për barna do të hyjë në fuqi në vitin e ardhshëm. Sipas Vitisë, ky ligj do ta rregullojë edhe tregun farmaceutik.

Ai më tej foli për vdekshmërinë e foshnjave, ku mohoi në saktësinë se vdekshmëria është në 16 promil. Sipas tij, vdekshmëria e foshnjave është rreth 7 promil.

Vitia foli edhe për aspekte të parandalimit të sëmundjeve, ndërsa përmendi kalendarin e vaksinimit, ku tha se është pesëfishuar buxheti për vaksina, si dhe parandalimin në disa sëmundje.

Ai përmendi se rreth 10 milionë investime kanë ndodhur në klinika të ShSKUK-së.

Ministri Vitia ftoi ish-ministrin e Shëndetësisë, deputetin nga radhët e LDK-së, Armend Zemaj, që të vizitojë klinikat në ShSKUK-së e të shikojë gjendjen në të cilën ndodhet tani ky institucion shëndetësor.

Vitia tha se në mbledhjen e radhës të qeverisë do të procedohet edhe statuti i ri i ShSKUK-së, ku QKUK-ja do të jetë identitet më vete.

A prishet cilësia e gjumit nëse pini kafe në mbrëmje?

Sponsoruar