Kështu ka vlerësuar komisioni për shkak se disa persona nga komuniteti i këtij këshilli kanë qenë të acaruar.

Madje pas vendimit për anulim, mes banorëve të fshatrave Besi, Rimanishtë, Vranidoll e Tenezhdoll, pati kacafytje, me ç’rast është dashur të njoftohet edhe policia.

Klan Kosova e ka kontaktuar drejtorin e Administratës në Komunën e Prishtinës, Bersan Beka, për të mësuar më shumë rreth kësaj ngjarjeje dhe i njëjti ka treguar si erdhi deri te anulimi i procesit.

“Dje është organizuar zgjedhja e kryetarit dhe anëtarësisë së këshillit lokal në Besi dhe meqenëse kishte disa parregullsi, është dashur që të anulohet, meqenëse komisioni e vlerësoi se është me rrezikshmëri vazhdimi i procesit të zgjedhjes së atij këshilli lokal”, ka treguar Beka për Klanin.

Tutje, ai ka treguar se kacafytja në mes të personave në fjalë ka ndodhur pasi që komisioni ka vendosur ta anulojë procesin.

“Pasi komisioni mori vendim për anulim, gjendja filloi të acarohej nga komuniteti i atij këshilli lokal, ku mbërriti edhe deri te kacafytja e disa personave, ku më pastaj u thirr edhe Policia e Kosovës në vendin e ngjarjes dhe filloi procesi i hetuesisë nga ana e policisë”, shtoi Drejtori i Administratës, Bersant Beka.

Se ka pasur kacafytje në mes të disa banorëve në këtë ngjarje, këtë e ka konfirmuar edhe asamblisti i Lëvizjes Vetëvendosje në Komunën e Prishtinës, Feim Osmani.

“Afër 350 banorë që ishin tubuar mbrëmë treguan qytetari e dëshirë për të zgjedhur përfaqësues të denjë, por që e tëra u përmbys për shkak të sjelljes huligane të një numri të vogël banorësh të cilët asnjëherë nuk kanë qëllim zgjedhjet, por gjithherë duan të shpërfaqin anën e tyre të errët- mbizotërimin me dhunë”, ka shkruar Osmani në llogarinë e tij në Facebook.

Madje Osmani la të kuptohet se personat që e shkaktuan këtë ekses ishin nga fshati Vranidoll.

“Të dashur vendas, ata kanë emër e mbiemër, kanë vendbanim, lagje e familje, por të jeni të sigurt se nuk janë pasqyra e vërtetë as e fshatit as e lagjes, përveç e emrit të tyre personal e ndoshta edhe familjes. Vranidolli sidomos, ka djem e vajza të mrekullueshëm që kanë dije, kompetencë e trimëri e të cilën edhe e kanë dëshmuar kur ka qenë koha, prandaj sot ata huliganët e mbrëmshëm nuk mund ta njollosin e as ta damkosin fshatin Vranidoll e as banorët e tij, sidoqoftë me ta tanimë do të merret policia e hetuesia”, deklaroi mes tjerash Osmani.

Në fund, ai pranoi se kushtet për zhvillimin e zgjedhjes së kryetarit dhe anëtarësisë së këshillit lokal në fshatin Besi nuk kanë qenë ideale, por theksoi se “sjellja e dhunshme është e papranueshme dhe e dënueshme”.

Ndërkaq, siç merr vesh Klankosova.tv jozyrtarisht, në këtë përleshje së paku një person ka mbetur i lënduar.

Vlen të theksohet se rasti nuk është përfshirë fare në raportin 24-orësh të Policisë së Kosovës.