Lajme

Ambasadori palestinez që e quante Kosovën pjesë të Serbisë, largohet nga Beogradi

Autori: Gazeta inFokus 16:24 | 26 January 2023

Presidenti i Serbisë, Aleksandar Vuçiq, ka pritur të enjten në një vizitë lamtumirëse ambasadorin palestinez në Serbi, Muhamed Nabhan të cilin e ka falënderuar “për kontributin e jashtëzakonshëm që ka dhënë në marrëdhëniet e ngushta ndërmjet dy vendeve dhe dy popujve gjatë mandatit të tij afatgjatë”.

Nabhan ka qenë i lidhur me Serbinë për disa dekada. Ka studiuar në Beograd, fëmijët e tij kanë lindur atje dhe që nga viti 2006, ai ka shërbyer si ambasador i Palestinës.

Nabhan në deklaratat e tij në Beograd vazhdimisht e ka përsëritur se Palestina nuk do ta njohë kurrë Kosovën.

-Advertisement-

Në një deklaratë të viteve më parë, Nabhan, vlerësonte se paralelja ndërmjet Gazës dhe Kosovës do të ishte e pa arsyeshme pasi që, siç ka thënë ai “Kosova gjithmonë ka qenë pjesë e Serbisë, ndërsa Gaza dhe Bregu Perëndimor kurrë nuk kanë qenë pjesë e Izrealit”.

“Kosova nuk e ka fituar statusin e shtetësisë falë vendeve arabe dhe myslimanëve e as falë Izraelit. Arabët kanë mbështetur qëndrimin e Serbisë dhe ende e mbështesin”, thoshte Nabhan.

Megjithatë Izraeli e ka njohur pavarësinë e Kosovës më vonë.

Madje Nabhan thoshte se Serbia s’e ka okupuar kurrë Kosovën.

“Kosova gjithmonë ka qenë pjesë e Serbisë, ndërsa Gaza dhe Bregu Perëndimor kurrë nuk kanë qenë pjesë e Izrealit. Këto janë territore të okupuara, ndërsa Serbia kurrë nuk e ka okupuar Kosovën. Paralelja do të ishte e arsyeshme në rast se serbët do të ishin okupatorë”, ka thënë ambasadori palestinez në një intervistë dhënë medieve në Serbi.

Në takimin e fundit me Vuçiq, Nabhan e ka quajtur atë model se si duhen mbrojtur interesat kombëtare.

E Vuçiq ia kthyer duke thënë se ambasadori Nabhan la gjurmë të thella në shoqërinë serbe me personalitetin dhe punën e tij të palodhur, njoftoi shërbimi për shtyp i Presidentit të Serbisë.

“Si mik i dëshmuar i Serbisë dhe njohës i mirë i kushteve në vendin dhe rajonin tonë, besoj se do të vazhdoni të promovoni bashkëpunimin tonë në të ardhmen, aq sa ju lejojnë mundësitë tuaja”, tha Vuçiq.

Subscribe në YouTube: GAZETA INFOKUSI