Sport

Alcacer i dhuron fitore spektakolare Dortmundit ndaj Augsburgut

Autori: Gazeta inFokus 18:19 | 06 October 2018

Sulmuesi i huazuar nga Barcelona, Paco Alcacer, ka bërë një paraqitje të paharrueshme duke ia dhuruar Borussia Dortmundit një fitore dramatike 4-3 ndaj Augsburgut në “Signal Iduna Park” të shtunën pasdite.

Tre golat e tij të vonshëm, dhe pasi ishte futur në lojë nga stoli, kanë bërë që Dortmundi ta përmbysë Augsburgun tri herë dhe t’ia dalë t’i rrëmbejë tri pikë të plota në mënyrën më të jashtëzakonshme që ka mundur ta bëjë, raporton Gazeta Express.

Vizitorët udhëhoqën dy herë dhe një herë tjetër e barazuan rezultatin në sekondat e fundit të kohës së rregullt, por Alcacer pati një natë për të mos e harruar kurrë, duke e barazuar rezultatin dy herë para se ta shënonte golin e fitoren në minutën e gjashtë të kohës shtesë.

-Advertisement-

Augsburgu kaloi në epërsi pas 22 minutave lojë falë Finnbogasonit, rezultat me të cilin edhe u mbyll pjesa e parë.

Paco zëvendësoi Philippin kur akrepat shënonin një orë lojë në “Signal Iduna Park”. Vetëm tre minuta më vonë, spanjolli e barazoi rezultatin në 1-1.

Saktësisht gjysmë ore para fundit, Augsburgu e ktheu epërsinë, duke e bërë Pacon të përgjigjej me të njëjtën monedhë si më parë. Paco realizoi sërish 10 minuta para fundit.

Mario Gotze më pas përmbysi gjithçka dhe e kaloi Dortmundin në epërsi 3-2, në minutën e 84-të, vetëm shtatë minuta pasi që ishte futur në lojë.

Drama vazhdoi me Gregoritsch, i cili e barazoi rezultatin për herë të parë për Augsburgun në këtë takim në minutën e 87-të.

Mbi 81 spektatorë i çmendi spanjolli Paco, i cili shënoi në minutën e gjashtë shtesë, duke i vënë kapakun një ndeshjeje dramatikë të futbollit në Dortmund.

Dortmundi mbetet skuadër e pamposhtur dhe tani ka 17 pikë në vendin e parë, tri më shumë se Werder në vendin e dytë dhe katër më shumë se Bayern Munich në vendin e katërt.

Subscribe në YouTube: GAZETA INFOKUSI