Lajme

Albena Reshitaj kundërshton masën anti-Covid për shtetasit e huaj, ka një propozim për qeverinë

Autori: Gazeta inFokus 16:25 | 27 January 2022

Edhe deputetja e Aleancës për Ardhmërinë e Kosovës, Albena Reshitaj, e ka kundërshtuar vendimin e qeverisë Kurti, ku shtetasve të huaj u kërkohen tri doza të vaksinës për të hyrë në vendin tonë, shkruan Gazeta inFokus.

Reshitaj në seancën e jashtëzakonshme të kuvendit të Kosovës, ku po diskutohet për situatën me pandemi, i ka propozuar qeverisë që kjo masë të zëvendësohet me bërjen e testeve rapide falas në kufi.

Sipas saj po të aplikoheshin testet rapide para festave të fundvitit, tashmë vendi do të ballafaqohej me një numër më të ulët të rasteve pozitive.

-Advertisement-

“Nga përvoja e deritanishme kemi kuptuar se individët infektohen dhe bëhen bartës të infeksionit edhe me dy doza të vaksinës që do thotë edhe me dozën e tretë mund të bëhesh bartës i infeksionit. Ata që kanë marrë dozën e dytë apo që kanë kaluar një variant të virusit dhe kanë ende imunitet, kushtimisht nuk mund të marrin dozën e tretë dhe tjetra, ka shumë vende që frekuentojnë vendin tonë dhe nuk kanë arritur të organizohen për marrje masive të dozës së tretë. Prandaj, unë i propozoj Qeverisë së Kosovës që të rishikojë këtë masë dhe në vend të kësaj të vendos në kufijtë tonë tokësorë dhe ajrorë testimet rapid falas për qytetarët që hyjnë në vendin tonë me ç’rast në besueshmëri prej 90% për pak minuta mund të kuptojmë se ndonjë person i infektuar mund të futet në Kosovë. Po të kishte ndodhur një masë e tillë para festave të fundvitit jam e bindur që do të kishim një situatë krejt tjetër pa numër kaq të rritur të të infektuarve dhe me një monitorim më të mirë të situatës”, tha Reshitaj.

Në 24 orët e fundit në vendin tonë kanë vdekur 6 persona, kurse janë regjistruar edhe 3.917 raste të reja me Covid-19./Gazeta inFokus/