Lajme

Abdixhiku: Policia ka kryer punën, është koha e diplomacisë

Autori: Gazeta inFokus 20:59 | 19 October 2023

Si duket edhe pas provokimeve të Serbisë, presioni ndërkombëtar ndaj Kosovës nuk po ç’bëhet”, ka deklaruar kryetari i Lidhjes Demokratike të Kosovës, Lumir Abdixhiku.

Abdixhiku tha se çështja e përballjes me Serbinë për Kosovën nuk është e re asnjëherë.

“Kjo çështje s’është e re asnjëherë. Këtë herë ka përmasa të sigurisë në formë të terrorizmit sepse faktet tani janë të qarta, Kosova s’ka strehuar terroristë dhe mbi të gjitha është e qartë me gjithë sasinë e armatimit që kemi një sulm të orkestruar. Në një përballje të tillë është e rëndësishme që Kosova të tregohet e matur dhe e vendosur”, ka thënë kryetari Abdixhiku, në KTV.

-Advertisement-

Ai tutje ka shtuar se Policia e Kosovës e ka fituar betejën në terren, ndërsa tani koha është e diplomacisë.

“Kam deklaruar se djemtë e vajzat tona e kanë fituar betejën në teren, tani është koha e diplomacisë të tregon veten”, ka thënë Abdixhiku.

Ai ka shtuar se ka pritur angazhim më të madh diplomatik sidomos në qendrat kryesore botërore.

Sipas liderit opozitar, Qeverisë Kurti i mungon strategji për bashkëpunim me aleatët.

“Strategjia s’mund të vijë pas disa hapave të gabuar. Për të ndjekur ku ka filluar hapi i gabuar unë mendoj se vjen prej ditës së parë kur s’kemi trajtuar dialogun me seriozitetin e plotë. Madje kemi thënë se s’është prioritar, por kemi kërkuar riformatim. Me të gjitha të metat, që mendoj se ka pasur plot sepse isha ndër kritikët që nga 2012-a e tutje, mendoj se vlera thelbësore ka qenë që asgjë s’është dakorduar deri sa gjithçka të dakordohet. Parimi thelbësor i ka lënë hapësirë Kosovës të mos futet në marrëveshje të ndërmjetme, por të synojë marrëveshjen finale me njohjen reciproke në qendër. Koha s’na pret, po të merreshim nga shkurti i 2021-s si prioritet kombëtar, po të besonim se ishte interes, do të bëheshin përpjekje të mbylljen në parimet që na interesojnë”, ka thënë ai duke shtuar se nga Kosova ka pasur qasje refuzuese.

Subscribe në YouTube: GAZETA INFOKUSI