Lajme

Kush i mori 76 milionë euro të “veteranëve fake”?

Autori: Gazeta inFokus 11:00 | 17 Gusht 2018

Shtimi i veteranëve të rrejshëm te Ushtrisë Çlirimtare ka sjellë përfitime të mëdha për sekserët e kësaj pune. Prej 19 mijë veteranëve mashtrues zyrtarisht secili dyshohet se ka paguar deri 4 mijë euro për certifikatë, shkruan gazeta inFokus

Për një gjë të tilë ka folur edhe Kryetari i Këshillit për Mbrojtjen e Veteranëve të UÇK-së, Xhevdet Qeriqi.

Në vitin 2016, Qeriqi, pati zbuluar për media se tre deri në katër mijë euro dyshohet të jetë paguar për një vend në listën e veteranëve të Ushtrisë Çlirimtare të Kosovës.

-Advertisement-

“Në bazë të informatave, në bazë të takimeve që kam me veteranë kanë ndodh shumë raste që më kanë thënë në tavolinë se ka raste që kanë dhënë mjete. Sa kam dëgjuar ka qenë deri në 3 mijë 4 mijë euro për të qenë pjesë e listës dhe për të përfituar pensionin të veteranit të luftës”, pati thënë ai.

Edhe vet kryeprokurori i shtetit Aleksandër Lumezi ka konfirmuar futjen në lista të 19 mijë veteranëve të rrejshëm.

“Në bazë të informacioneve që unë i kam, në fazën e hetimeve janë siguruar prova qe vërtetojnë se 19 mijë veteranë të luftës kanë përfituar në mënyrë të kundërligjshme benefite që ua ka dhënë komisioni për veteran dhe invalid të luftës”, ka thënë Lumnezi.

E nëse kalkulohen shifrat i bie se për 19 mijë veteran të rrejshëm dikush i ka marr 76 milionë euro.

Në aktakuzën të cilën e ka përpiluar prokurori, Elez Blakaj, janë akuzuar 12 persona.

Aktakuza ka 64 faqe është ngritur më 11 korrik 2018 e të akuzuar janë: Agim Çeku, Nuredin Lushtaku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Smajl Elezaj, Fadil Shurdhaj, Xhavit Jashari.

Ndryshe krejt të dhënat i ka nxjerr prokurori i dorëhequr Elez Blakaj. Ai tashmë ka dorëzuar aktakuzë në gjykatë për veteranët e rrejshëm. Ai ka dhënë dorëheqje si pasojë e kërcënimeve të shumta./ Gazeta inFokus