Lajme

“PDK në opozitë, ky duhet të jetë koalicioni i ri”

Autori: Gazeta inFokus 16:50 | 21 June 2017

Analisti politik, Krenar Shala ka thënë se tani më ka ardhur koha që VV-ja të jetë në pushtet dhe PDK-ja të shkojë në opozitë, dhe zgjidhja më e mirë do të ishte koalicioni LVV-LDK ,raporton Gazeta Blic.

Sipas Shalës LDK-ja është dënuar në zgjedhjet e 11 qershorit për shkak të tradhtisë që i bëri VLAN-it.

“Mendoj që në këto zgjedhje qytetarët kanë votuar qartazi për ndryshim: VV-ja duhet të vij në pushtet, PDK-ja të zhvendoset në opozitë, dhe LDK-ja është dënuar që tradhtoi VLAN-in duke hyrë në koalicion me PDK-në. Kjo situatë tanimë tregon që legjitimiteti arrihet nëse kihet parasysh vullneti i qytetarëve. Pra, VV-ja duhet të jetë bartëse e ndryshimit në vend. Por pasi nuk është e mundur që të arrihet formimi i qeverisë me numrin e tanishëm të deputetëve, atëherë zgjidhja më e mirë është koalicioni me LDK-në. Kështu do të legjitimohej kërkesa e qytetarëve për ndryshim”, ka thënë ai.

-Advertisement-

Shala më tej ka thënë se në qoftë se në krye të LDK-së do të jetë prapë Isa Mustafa atëherë LDK-ja nuk e ka seriozisht ndryshimin në vend.

“Nëse krerët e LDK-së vazhdojnë të insistojnë në kreun e Qeverisë atëherë mendoj që ata nuk e kanë seriozisht ndryshimin në vend, pjesë thelbësore e së cilës është dhe zhvendosja e PDK-së në opozitë, si përgjegjësja kryesore gjendjes së rëndë shoqëroro-ekonomike në vend”, ka thënë ai.

Ndryshe ka qenë pikërisht kandidati për kryeministër nga radhët e VV-së, Albin Kurti i cili ka bërë thirrje publike Lidhjes Demokratike të Kosovës, që t’i bashkohet partisë së tij dhe së bashku ta formojnë qeverinë e re.

Në anën tjetër zyrtarët e LDK-së, kanë vendosur që të presin certifikimin e rezultateve nga KQZ e pasaj të flasin për një koalicion të mundshëm.

Subscribe në YouTube: GAZETA INFOKUSI