Megjithatë, sekretari amerikan i Transportit, Sean Duffy, ka parashikuar se trafiku ajror do t’i kthehet normalitetit deri të hënën, ndërsa kompanitë ajrore po përpiqen të rikthejnë oraret e rregullta pas ndërprerjes së përgjithshme të fluturimeve.

Sipas të dhënave të platformës FlightAware, të dielën janë anuluar më shumë se 1,600 fluturime në mbarë vendin, ndërsa afro 3,600 të tjera janë vonuar. Një ditë më parë, kompanitë ajrore kishin anuluar mbi 6,400 fluturime dhe kishin regjistruar më shumë se 8,000 vonesa.

Duke folur për programin “This Week” të televizionit ABC, Duffy tha se nuk ka prova për ndonjë sulm kibernetik apo qëllim tjetër keqdashës, por shkaku i saktë i problemit ende nuk është përcaktuar, raporton Reuters.

Ai tha se fluturimet do të fillojnë t’i kthehen normalitetit të dielën, ndërsa rikthimi i plotë pritet të ndodhë të hënën. Duffy theksoi se prioritet i Administratës Federale të Aviacionit (FAA) mbetet siguria e udhëtarëve.

Të dielën, 27 për qind e fluturimeve të kompanisë JetBlue dhe 13 për qind e atyre të American Airlines u anuluan. Ndërkaq, Southwest, United Airlines dhe Delta raportuan anulimin e 3 deri në 5 për qind të fluturimeve të tyre.

Të premten, FAA-ja kishte urdhëruar ndalimin e fluturimeve në shkallë kombëtare, duke pezulluar pothuajse të gjitha nisjet për afro pesë orë. Kjo ishte ndërprerja më e gjatë e trafikut ajror në SHBA që nga sulmet terroriste të 11 shtatorit 2001.

Sipas zyrtarëve, instalimi i të paktën një ruteri të ri nga kompania kontraktore e FAA-së, L3Harris, në një objekt të largët shkaktoi mbingarkesë të qendrave të tjera të kontrollit ajror nga një sasi e madhe të dhënash, duke penguar funksionimin e sistemeve të komunikimit.

Duffy shpjegoi se zëvendësimi i një ruteri në një objekt të FAA-së në El Dorado të Arkansasit shkaktoi probleme me një ruter që ishte zëvendësuar së fundmi në Amarillo të Teksasit. Ky i fundit nisi të transmetonte të dhëna në mënyrë të tillë që mbingarkoi ruterët në qendrat e tjera të kontrollit ajror në të gjithë vendin.

FAA-ja bëri të ditur të dielën se kishte çaktivizuar funksionimin e ruterëve që shkaktuan problemin, si dhe kishte ndërmarrë të njëjtën masë për rreth 60 pajisje të ngjashme në sistemin e kontrollit të trafikut ajror.

Megjithatë, Duffy tha se autoritetet ende nuk e dinë shkakun përfundimtar të defektit, pavarësisht se punimet e mirëmbajtjes së kësaj natyre janë kryer mijëra herë më parë pa shkaktuar probleme.

Ai tha se punëtori që kishte instaluar ruterin ishte veteran dhe, sipas vlerësimit të tyre, patriot amerikan, duke shtuar se nuk besojnë se instalimi ishte bërë me qëllim sabotimi të rrjetit.

“Por ende nuk e kemi identifikuar shkakun rrënjësor të problemit”, tha Duffy.

Ndërprerja e së premtes është shenja më e fundit dhe më e rëndë e problemeve me të cilat po përballet sistemi amerikan i kontrollit të trafikut ajror. Ky sistem është i ngarkuar me teknologji të vjetruar, probleme me pajisjet dhe komunikimin, si dhe mungesë të disa mijëra kontrollorëve të trafikut ajror.

Duffy tha se ruterët që pësuan probleme ishin blerë në vitin 2001 dhe kishin dalë jashtë përdorimit të rekomanduar që nga viti 2006.

Pas ndërprerjes, ai ka kërkuar 50 miliardë dollarë për modernizimin e sistemeve të kontrollit të trafikut ajror, duke e rritur kërkesën e mëparshme prej 30 miliardë dollarësh. Kjo vjen pasi Kongresi kishte miratuar 12.5 miliardë dollarë vitin e kaluar për këtë qëllim.

Trump kërkon financim shtesë

Edhe presidenti amerikan, Donald Trump, reagoi të dielën për herë të parë publikisht lidhur me problemet e trafikut ajror gjatë fundjavës, duke kërkuar financim shtesë nga ligjvënësit amerikanë.

“Ne tashmë e kemi nisur punën, por ajo duhet të përfundojë e gjitha njëherësh dhe jo pjesë-pjesë. Kongresi duhet ta miratojë”, shkroi Trump në rrjetet sociale.

Demokratët pritet të marrin kontrollin e Kongresit në janar, pas rezultateve të zgjedhjeve të mesmandatit të 3 nëntorit, në të cilat fituan vende shtesë.

Ndërkohë, kërkesa e Duffy-t për më shumë fonde është pritur me skepticizëm nga dy përfaqësuesit demokratë në Dhomën e Përfaqësuesve, Rick Larsen dhe André Carson, të cilët janë zyrtarët kryesorë demokratë në Komitetin për Transport dhe Infrastrukturë dhe nënkomitetin e tij për aviacionin.