Lidhja Demokratike e Kosovës (LDK) ka reaguar ndaj presidentes Shiroka-Pula, pas raportimeve për largimin e fotografisë së ish-presidentit Ibrahim Rugova dhe Deklaratës së Pavarësisë nga hapësirat ku ishin vendosur në Presidencë.

Përmes një reagimi publik, LDK-ja e ka kundërshtuar këtë veprim, duke vlerësuar se fotografia e Rugovës dhe Deklarata e Pavarësisë nuk mund të trajtohen thjesht si pjesë e dekorimit të hapësirave institucionale.

Sipas kësaj partie, fotografia e ish-presidentit Rugova ishte vendosur nga ish-presidentja Vjosa Osmani, ndërsa Deklarata e Pavarësisë nga ish-presidenti Fatmir Sejdiu.

-Advertisement-

“Presidenca është institucion shtetëror ku nderohen themeluesit e shtetit dhe aktet mbi të cilat është ndërtuar ai. Fotografia e Atit Themelues të Republikës së Kosovës dhe Deklarata e Pavarësisë kanë domethënie historike e shtetërore”, thuhet në reagimin e LDK-së.

Partia ka kritikuar edhe zëvendësimin e mundshëm të këtyre simboleve me vepra arti, duke e cilësuar një qasje të tillë të papranueshme.

LDK-ja ka theksuar se Ibrahim Rugova përfaqëson një periudhë të rëndësishme të përpjekjeve të Kosovës për liri dhe pavarësi, ndërsa Deklarata e Pavarësisë është një nga dokumentet themelore të shtetësisë së vendit.

Sipas saj, institucionet shtetërore kanë përgjegjësi të ruajnë dhe të respektojnë trashëgiminë historike, pavarësisht se kush e ushtron detyrën e presidentit.

“Presidenca ka përgjegjësi të ruajë vazhdimësinë e shtetit dhe të nderojë trashëgiminë e tij. Kjo përgjegjësi tejkalon mandatin e secilit president”, theksohet në reagim.

Në fund, LDK-ja i ka kërkuar presidentes Shiroka-Pula ta rishqyrtojë vendimin dhe t’i rikthejë fotografinë e Rugovës dhe Deklaratën e Pavarësisë në vendet e mëparshme.

Sipas kësaj partie, rikthimi i tyre do të ishte një shprehje e respektit institucional ndaj historisë dhe themeleve të Republikës së Kosovës./Gazeta Infokus

Udhëto Oslo – Prishtinë çdo javë me PrishtinaTickets

Sponsoruar

-Advertisement-