Sport

Dalin në shitje biletat për ndeshjen Izrael-Kosovë

Autori: Gazeta inFokus 11:11 | 28 Shtator 2026

Federata e Futbollit e Kosovës ka njoftuar se ka nisur shitja e biletave për sektorin e tifozëve kosovarë për ndeshjen ndërmjet Izraelit dhe Kosovës.

Takimi do të zhvillohet më 1 tetor 2026 në Debrecen të Hungarisë, me fillim nga ora 20:45, ndërsa dyert e stadiumit do të hapen në ora 19:15.

Tifozët e Kosovës do të jenë të vendosur në sektorin D3.

-Advertisement-

Gjatë procesit të blerjes së biletës, secili tifoz duhet të plotësojë me saktësi të dhënat personale dhe të identifikimit. Sipas njoftimit të FFK-së, kërkohen: Numri i letërnjoftimit ose pasaportës; Fotografia e letërnjoftimit ose pasaportës; Emri dhe mbiemri i plotë, saktësisht siç figuron në dokumentin identifikues; Adresa e emailit; Numri i telefonit.

FFK ka paralajmëruar se të dhënat duhet të përputhen plotësisht me dokumentin identifikues. Tifozët që nuk i ofrojnë të dhënat e kërkuara në mënyrë të saktë, apo të dhënat e identifikimit të të cilëve nuk përputhen me regjistrimin e biletës, nuk do të lejohen të hyjnë në stadium.

Shitja e biletave për tifozët e Kosovës do të jetë e hapur deri më 30 shtator, në ora 20:00.