Lajme

Ky është zyrtari i Ministrisë së Mjedisit që u arrestua për lejimin e importit të substancave të ndaluara në Kosovë

Autori: Gazeta inFokus 10:37 | 22 July 2026

Një operacion i përbashkët i Policisë së Kosovës dhe Prokurorisë Themelore të Prishtinës ka çuar në arrestimin e një punonjësi të Ministrisë së Mjedisit, i cili dyshohet se ka mundësuar hyrjen në vend të kimikateve dhe pesticideve të ndaluara.

Zyrtari i ndaluar është Nazmi Maxhera, i moshës rreth 63 vjeç.

Bazuar në të dhënat e siguruara nga Sinjali, aksioni u zhvillua më 21 korrik, në orën 11:30, nga Drejtoria për Hetimin e Krimeve Ekonomike dhe Korrupsionit, konkretisht Sektori për Hetimin e Korrupsionit, në partneritet me Prokurorinë Themelore në Prishtinë.

-Advertisement-

Nga hetimet e kryera rezulton dyshimi se Nazmi Maxhera, në rolin e tij si zyrtar përgjegjës për produktet biocide në ish-Ministrinë e Mjedisit, ka shkelur kufijtë e autoritetit të tij duke lëshuar licenca importi në kundërshtim me Ligjin për Biocide dhe Kimikate.

Materiali hetimor tregon se ai akuzohet se ka autorizuar hyrjen e lëndëve aktive të ndaluara, të përcaktuara në listën e Agjencisë Evropiane për Kimikate (ECHA), si dhe të pesticideve, licensimi i të cilave i takonte ligjërisht institucionit përkatës pranë Ministrisë së Bujqësisë.

Sipas burimeve të Sinjalit, si pasojë e këtyre autorizimeve, substancat e ndaluara mendohet se kanë mbërritur në Kosovë në momente të ndryshme nëpërmjet operatorëve të ndryshëm ekonomikë.

Gjatë ndërhyrjes së policisë, të dyshuarit i janë konfiskuar përkohësisht dy aparate celularë, ndërsa ai është marrë në pyetje me pjesëmarrjen e mbrojtësit të tij ligjor.

Me urdhër të Prokurorit të Shtetit, Nazmi Maxhera është vendosur në mbajtje për 48 orë, nën akuzat për veprat penale “Keqpërdorim i detyrës ose autoritetit zyrtar” dhe “Falsifikim i dokumentit zyrtar”.

Veprimet hetimore për këtë çështje po vazhdojnë dhe synojnë të sqarojnë nëse nga këto veprime kanë pasur fitime operatorë të tjerë ekonomikë apo janë implikuar edhe individë të tjerë.

Teknologjia në kuzhinë nuk është vetëm çështje komoditeti, por edhe kohe: Njihuni me pllakën inovative me induksion Miele KM 8000!
-Advertisement-

T� tjera

Ky website përdor cookies. Duke vazhduar përdorimin, ju pranoni përdorimin e tyre.

Privacy policy